Regering besorg oor aanvalle op uitlanders

SAvlag

Suid-Afrikaanse vlag. Argieffoto.

Lindiwe Sisulu, minister van internasionale betrekkinge en samewerking, het ʼn dringende vergadering met Afrika-ambassadeurs in Pretoria versoek om die vlaag van geweld wat uitlanders en hul eiendomme teiken, te bespreek.

“Die minister het haar ernstige kommer uitgespreek oor die situasie en doen ʼn beroep op wetstoepassers om misdadigers en vandaliste aan te keer,” het Ndivhuwo Mabaya, woordvoerder van die departement, Saterdag gesê.

Sisulu het gesê Suid-Afrikaanse maatskappye en Suid-Afrikaners kan oor die kontinent heen onverhinderd betrokke wees by verskillende maatskappye. “Suid-Afrikaanse maatskappye en ons burgers word oor die kontinent heen verwelkom. Ons moet dieselfde hier doen; ons moet ons bure en mede-Suid-Afrikaners verwelkom.”

Sy het gesê die Afrika-kontinent en ander lande in die wêreld kyk na Suid-Afrika vir leierskap in verskillende internasionale forums, insluitend die Verenigde Nasies (VN), die Afrika-Unie (AU) en die Suider-Afrikaanse Ontwikkelingsgemeenskap (SAOG).

“Suid-Afrika word deur alle Afrika-lande en talle lande in die wêreld ondersteun om ʼn permanente setel te hê in die VN-veiligheidsraad; dit is tans die adjunkvoorsitter van die AU en die voorsitter van die AU in 2020. Hierdie verantwoordelikhede vereis dat ons brûe moet bou tussen lande, spesifiek in die SAOG en die kontinent,” het Sisulu bygevoeg.

“Almal van ons moet opstaan en ʼn sterk boodskap uitstuur dat geweld, alle kriminele aktiwiteit en die plunder van eiendomme van uitlanders nie geduld sal word nie, en die polisie en ander wetstoepassers moet sonder vrees of guns optree.”

Die departement het gesê die vergadering sal “so vinnig as moontlik” plaasvind en sal fokus op hoe ambassadeurs en die regering met gemeenskappe en ander belanghebbendes kan werk om integrasie in gemeenskappe te bevorder.

Die Suid-Afrikaanse regering het Donderdag gesê hy is besorg oor aanvalle op uitlanders in KwaZulu-Natal. Meer as 150 uitlanders wat in ʼn informele nedersetting in Clare Estate in Durban woon, moes uit die gebied vlug toe hulle deur ʼn groep mans aangeval is. Verskeie boodskappe doen die ronde in Suid-Afrika met waarskuwings van betogings teen die indiensneming van uitlanders in die land.

Zambië se president Edgar Lungu het die SAOG-voorsitter, Namibiese president Hage Geingob, gekontak om sy kommer uit te spreek oor aanvalle op uitlanders in sommige dele in Suid-Afrika.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

33 Kommentare

jongste oudste gewildste
Danien

Dit wat gebeur praat ek nie goed nie. Maar kom ons kyk na die probleem en dit is die ANC hulle het die grense oopggemaak en nou sit ons met ons eie mense wat nie werk het of kry omdat duisende van buite inkom en werksgeleenthede kry wat hul nie toekom nie. My vraag is hoeveel van ons swart bevolking werk in Zimbabwe, Mosambiek , Nigerie, Malawi en ander lande. Bitter min maar die regering laat hulle invloei soos miere en die skuld moet voor hul deur le. Gaan kyk die dorpe en stede dit wemel van Nigeriers. Dit is… Lees meer »

Andre Coetzee

Lol…bekommerd.Julle kan nie eers julle eie mense beskerm nie…hoe wil julle ooit buitelanders beskerm?

Alida X

Groter besorgdheid en dringendheid oor aanvalle op uitlanders as oor aanvalle op SA Burgers.
Ons is welkom in ander lande maar het nie toegang tot die ander lande soos almal wat na SA kom nie. Daar geld paspoort regulasies.
Elke Jan Rap en sy maat kan ook nie net bly en gratis medies kry nie.
Kan nie regtig SA se situasie vergelyk met SA’ners se besoeke aan Afrika lande nie
Daar kan jy nie net oor die grens loop en vir altyd bly en begin “demand” nie.
Maar wragtag die Sa’ners wil ook nie werk nie, lewe op grants en kry baie goed verniet.

Waarheid

Julle is meer besorg oor aanvalle op uitlanders as aanvalle op boere op plase wat Suid Afrikaners is.

Manie

Hierdie aanvalle is nie die eerste keer dat dit gebeur. Ek dink dit is n Afrika probleem sodra ander een n soort van lewe vir hom kan maak en die ander nie. Hulle praat ook net oor hoe erg hulle oor hulle broers is veral politici maar die broers moet heeltyd omkyk vir n mes in die rug