Regering gooi nóg ʼn reddingsboei vir SAL

Argieffoto

Die Suid-Afrikaanse regering het Vrydag die oorplasing van geld van die Nasionale Inkomstefonds na SAL goedgekeur om die lugredery in staat te stel om sy skuldverpligtinge teenoor Citibank na te kom.

SAL moet teen die einde van September sy verpligtinge teenoor Citibank nakom in terme van ʼn totale lening van R6,8 miljard, terwyl die lugredery so diep in die finansiële knyp is dat hy selfs sukkel om salarisse te betaal.

Citibank het ook SAL se R250 miljoen korttermyn bankfasiliteit gekanselleer weens ʼn tekort aan regeringswaarborge, wat die lugredery nou sonder kontantvloei laat.

Die tesourie het gesê die fondse sal gebruik word om die SAL te help met sy onmiddellike bedryfskapitaalvereistes. “Die betaling is gedoen ooreenkomstig artikel 16 van die Wet op Openbare Finansiële Bestuur,” het die tesourie gesê.

“Hierdie gedeelte van die wetgewing stel dat die minister die gebruik van geld kan goedkeur om uitgawes van buitengewone aard te dek waarvoor daar nie tans voorsiening gemaak word nie en wat nie, sonder ernstige benadeling van openbare belang, uitgestel kan word vir ʼn toekomstige parlementêre toekenning van geld nie.”

Die tesourie het gesê die regte prosesse soos deur die wet voorgeskryf sal gevolg word en het bygevoeg die verbetering van die finansiële posisie van die lugredery deur middel van herkapitalisering was sedert die begrotingsrede in Februarie op die regering se agenda. Volgens die tesourie word verskeie opsies ondersoek en sal nuwe inligting volgende maand tydens die mediumtermyn-begrotingsrede gegee word.

Die regering het nog nie die opsie uitgesluit om sy 39% aandeel in Telkom te verkoop om die winslose SAL te red nie, terwyl daar ook berig word die tesourie beplan ʼn spesiale wetsontwerp om R10 miljard aan die lugredery in 2017/18 te bewillig.

“Die aanstelling van ʼn voltydse hoof vir SAL, mnr. Vuyani Jarana, wat op 1 November 2017 die rol sal oorneem, is ʼn belangrike stap om te verseker dat die lugredery se omdraaistrategie geïmplementeer word. Ander aanstellings in sleutelposisies sal binnekort volg,” het die tesourie gesê.

“Soos voorheen gemeld, die lugredery is ʼn strategiese bate en sy rol as die nasionale lugredery dien as ʼn ekonomiese bate met direkte en indirekte voordele oor ʼn wye spektrum van ekonomiese aktiwiteite.”

Mmusi Maimane, leier van die DA, het Donderdag gesê die tesourie se beplande R10 miljard reddingsboei aan die SAL sal slegs korttermyn verligting bring en die enigste oplossing is om die nasionale lugredery onder sakeredding te plaas met die oog daarop om dit te privatiseer.

Maimane het gesê die somtotaal van reddingsboeie aan die SAL sedert 1999 is R14,4 miljard, terwyl die maatskappy se verlies die afgelope vyf jaar altesaam R15,7 miljard was.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

33 Kommentare

jongste oudste gewildste
al

Te lekker lag ek nou – strategiese bate!! Daar is baie goedkoper lugrederye binnelands. By party dorpe moet jy ten duurste betaal vir hul lugredery en hul versmoor die kompeterende mark.
Ons is sat vir die onbevoegde spul. SABC is konsuis ñ bate, maar niemand stel belang in hul afgewaterde diens.

Dafer

Was die SAL al ooit so winsgewend dat jy jou geld lang termyn daarin sou wou bele? Ek onthou vaagweg dat ek voor ’86 met iemand gesels het wat daar gewerk het, en die SAL was toe al gereeld in die knyp.

Jacques venter

Google gerus. ” Pamperred SAA pilots” berig in Citizen gee n klomp lig opdie sittuasie

Jos

“ekonomiese bate”?? Dis seker ‘n drukfout. Moet seker “ekonomiese las” wees. Daar is ander lugrederye binnelands en oorsee waarvan ons gebruik kan maak.

Chrisna Botha

Wonder daar kom die geld nou so skielik vandaan om die sinkende skip te red? Daai aanloklike pensioengeld?