Regering skenk R50 miljoen aan Kuba

Kubaanse gesondheidswerkers kom in April verlede jaar in Suid-Afrika aan. (Foto: GCIS)

Die regering gaan R50 miljoen aan Kuba skenk, in ʼn poging om die voedseltekort in dié land te help aanpak.

Alvin Botes, die adjunkminister van internasionale betrekkinge en samewerking, het die skenking Woensdag bekend gemaak ten tyde van ʼn sitting van die betrokke parlementêre portefeuljekomitee. Verskeie politieke partye het dié besluit gekap, veral in die lig van stygende werkloosheid en armoede op eie bodem.

“Die ANC gaan skynbaar uit sy pad om nuwe maniere te vind om geld na Kuba te gooi, terwyl Suid-Afrikaners letterlik honger ly,” het Willem Faber, DA-lid van die parlement, Donderdag gesê.

Die VF Plus meen die regering se skenking aan Kuba is “skandalig” en grens aan misdadigheid teenoor die mense van Suid-Afrika, veral teenoor hulpbehoewendes sonder kos of heenkome.

Kuba word tans deur ʼn dwingende voedseltekort in die gesig gestaar, onder meer weens sanksies wat deur die VSA teen dié land ingestel is. Volgens internasionale mediaberigte het Kuba onlangs ook geen melkvoorrade gehad nie.

Die VF Plus meen egter Suid-Afrikaners is steeds slegter daaraan toe. “Volgens Trading Economics was die werkloosheidsyfer in Kuba 3,5% teen die einde van 2021, terwyl Suid-Afrika steier onder sy hoogste werkloosheidsyfer ooit van bykans 35% met ʼn uitgebreide werkloosheidsyfer van 46,6%,” het dr. Corné Mulder, die VF Plus se woordvoerder van internasionale betrekkinge en samewerking, gesê.

“Dit beteken miljoene mense in Suid-Afrika leef in algehele armoede. Talle skole in Suid-Afrika het nog puttoilette, die polisie se begroting word weens geldnood gesny, misdaad bloei en dokters by die Charlotte Maxeke- akademiese hospitaal is vanjaar nog nie ten volle betaal nie. Dit is slegs enkele voorbeelde van ʼn land sonder geld wat weens algehele wanbestuur ekonomies in die dryfsand wegsak.”

Faber wys daarop dat die regering die afgelope paar jaar reeds kontrakte ter waarde van R1,4 miljard met Kuba aangegaan het om Kubaanse werkers en diensverskaffers in Suid-Afrika aan te stel.

“Dit is geld wat eerder aangewend kon word om werk te skep en voedselsekerheid in Suid-Afrika aan te pak.”

Mulder sê die feit dat Suid-Afrika hom ontferm oor ʼn ander land terwyl dit so sleg gaan op eie bodem, “gaan die verstand te bowe”.

“Net so verstommend is die rede wat aangevoer word vir die skenking. Die ANC vervreem homself net verder van die mense van Suid-Afrika – in hierdie geval weens ideologiese bande met ʼn baie twyfelagtige bondgenoot.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

52 Kommentare

jongste oudste gewildste
Misky

Waaaaaat????

PieterJ

Waarvoor is die omkoop nou eitlik die keer? Ek kan nie meer tred hou nie.

anniekiewiet

Pay back time. Onthou, die anc het nie n clue wat op grondvlak aangaan nie. En so omseil die regering namens Kuba, die sanksies teen lg.

Marlene

Ek lees verseker nie reg nie!

Elize

Seker ANC skuld wat met ons geld betaal word