Regsaksie oor Kubaanse ingenieurs nié teruggetrek

Die minister van water en sanitasie, Lindiwe Sisulu (Argieffoto: GCIS)

Solidariteit het nié sy beplande regsaksie teen die departement van menslike nedersettings, water en sanitasie in verband met die invoer van Kubaanse ingenieurs onttrek soos minister Lindiwe Sisulu beweer nie.

Die vakbond beplan inderwaarheid om sy regsaksie te “verskerp”.

Sisulu het Vrydag in ’n verklaring gesê sy verwelkom Solidariteit se besluit om sy regsaksie teen haar departement terug te trek. Die minister sê voorts sy beskou dit as ʼn positiewe stap wat verdere interaksie moontlik maak soos aanvanklik beoog is om ʼn gemeenskaplike grondslag met al die betrokke partye te vind.

Anton van der Bijl, hoof van regsdienste by Solidariteit, het egter Saterdag aan Maroela Media gesê die vakbond het hoegenaamd nié sy regsaksie teruggetrek nie.

(Foto: Yamil LAGE/AFP)

Solidariteit sou eerskomende Dinsdag in die hof wees om ʼn interdik teen die minister se planne vir die invoer en ontplooiing van Kubaanse ingenieurs te bekom.

Volgens van der Bijl is die saak bloot “by ooreenkoms” van Dinsdag se hofrol geskrap nadat die minister in haar hofstukke verskeie openbaarmakings gedoen het wat teen Dinsdag aan die publiek bekend gemaak moet word.

Van der Bijl sê hoewel die saak nie dán in die hof aangehoor sal word nie, dit allermins beteken dat regsaksie nie voortgaan nie. “Ons beplan eintlik om ons regsaksie te verskerp.”

Maroela Media het vroeër berig Solidariteit meen daar is geen regverdiging daarvoor om Kubaanse ingenieurs ten duurste in te voer om Suid-Afrika met sy waterprobleme te help nie terwyl daar wel Suid-Afrikaanse vaardighede beskikbaar is.

Die minister hou vol die Kubane is nie hier vir indiensneming nie, maar om munisipale amptenare te mentor sodat werk geskep kan word.

Die koste van die 24 Kubaanse ingenieurs beloop sowat R65 miljoen – en dít terwyl Kuba self probleme met sy waterinfrastruktuur ondervind.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

17 Kommentare

jongste oudste gewildste
Vrijburger

Streep in die grond, die Kubaanse invoer snert moet ophou.

Retha

My arme ou antie jy is verdwaal, gaan speel op die maan

Groen Ghoen

Ons hou duimvas, Solidariteit! Staan sterk teen die ANC se drogredenasies – dit is net julle wat nog dade by die woorde voeg, die res blaas maar net warm lug.

Althes

Ons maak staat op Solidariteit se volgehoue druk op die regering vir die vermorsing van belastinggeld op Kubaanse ingenieurs terwyl SA met die kundigheid sit.

Boerkind

Toe sy wakker word is haar koffie koud…