Regstappe dreig oor werk vir ‘slegs’ jong swartes

Argieffoto (Foto: VBlock/Pixabay)

Solidariteit het Hyundai en Yes4Youth-program tot Vrydag kans gegee om te reageer op ʼn regsbrief in verband met dié organisasies se indiensnemingsprogram wat slegs vir swart werklose jongmense beskikbaar is.

Connie Mulder, hoof van die Solidariteit Navorsingsinstituut (SNI), sê dit is aktiewe diskriminasie teen jong, wit werklose mense.

“Afgesien van velkleur is daar geen verskil in die omstandighede van die wit werklose en die swart werklose nie. Om iets wat aan rassevoorkeur gekoppel word ‘regstelling’ te noem, is absurd. Dit kom daarop neer dat hierdie organisasies mense skop wat reeds lê.”

Hy sê die krisis van jeugwerkloosheid is groter as ras. “Om steeds aan te voer dat ʼn spesifieke ras se jong werkloses groter waarde het as dié van ʼn ander ras, is moreel onverdedigbaar.”

Solidariteit het al in die verlede Yes4Youth daarop gewys dat dit absurd is om hulp aan werkloses volgens ras te verleen. Yes4Youth het daarna skriftelike beloftes aan Solidariteit se regspan gemaak dat die program vir alle jongmense oopgestel sou word.

Volgens Mulder het daar egter dadels van gekom en Solidariteit het toe besluit om die hof te nader om Yes4Youth se diskriminerende inisiatiewe in die bek te ruk.

“Hierdie geval is net die jongste verwikkeling in die regering se pogings om hulp vir mense in nood volgens ras uit te deel. Toe die Covid-19-pandemie op sy piek was, moes Solidariteit die regering hof toe neem oor die toerismefonds wat slegs vir swart mense bedoel was. Yes4Youth dwing ons nou weer om te moet opstaan vir die grondbeginsel dat hulp aan behoeftige hande verleen moet word en nie aan swart of wit hande nie.

“Om behoeftige mense wat vir hulp toustaan weens hul velkleur uit die tou te verjaag, is gewoon boos.”

Die VF Plus beaam Solidariteit se mening oor swart ekonomiese bemagtiging (SEB) en regstellende aksie (RA) en sê dit bemagtig niemand in Suid-Afrika nie.

Fanie du Toit, woordvoerder van die VF Plus in Noordwes, sê dit het die onbedoelde gevolg om verál jong mense uit minderheidsgroepe teen wie dié wette diskrimineer, te motiveer om te presteer ondanks regeringsbeleid.

“Die VF Plus wys reeds sedert 1994 daarop dat sulke uitsluitende wetgewing bloot nuwe vorme van diskriminasie skep en geen bydrae tot ekonomiese groei sal lewer nie. Slegs ʼn klein groepie polities verbinde mense het tot dusver hierby baat gevind en groot rykdom versamel terwyl die groter bevolking in armoede verval het,” sê Du Toit.

“Dit het gelei tot ʼn kultuur van selfverryking en korrupsie met aanstellings in die staatsomgewing wat die algemene verval van die staatsdiens bespoedig het. Die besef dat hierdie wetgewing en ANC-beleid ʼn werklike bedreiging vir die land se toekoms inhou, het reeds wyd posgevat.”

Ekonome en akademici soos Moeletsi Mbeki en William Gumede het dit reeds talle kere gestel dat die beleid geskrap behoort te word en dat vrye ekonomiese groei en entrepeneurskap bevorder moet word.

Die Internasionale Monitêre Fonds (IMF) het Suid Afrika ook in ʼn onlangse verslag gemaan dat beperkende arbeidswetgewing en ʼn oorgereguleerde ekonomiese omgewing ekonomiese groei ondermyn.

Die IMF het ook daarop gewys dat dit bydra tot die groot gaping in rykdom in die land.

“Terwyl die regering ʼn omgewing van verval in staatsafhanklikheid en agteruitgang bewerkstellig het, het ʼn groot aantal jongmense die dwaasheid van regeringsbeleid ingesien en self op innoverende wyses aan hul toekoms begin bou,” sê Du Toit.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

17 Kommentare

jongste oudste gewildste
Corne123

selfde as kfc en wat gaan gebeur stel oop vir almla maar as jy wit is word cv uitgegooi so maklik soos dit

Vonkprop

Yes4Youth se belofte om dit vir alle jeug oop te maak beteken niks. Hulle lees almal se CV’s om almal goed te laat voel, maar hulle finale besluit sal 100% swart jeug wees. Totdat hulle nie wit kies nie beteken dit niks.

Papsak

Ons moet dit vinnig stop regtig wat van ons jong wit mense wat nie werk kry nie worrie hulle nie daaroor nie

Anel

Vat hulle die stelling weg is dit net oë verblindery. Hulle neem in elke geval net swart in diens en sê die blankes kwalifiseer nie op grond van enige absurde rede. Soos met alles. Gaan kyk maar hoeveel jong blankes word werklik in diens geneem? En hoir dan die redes hoekom nie. So of daar nou gesê word slegs swart of enige iemand, hulle maak soos hulle wil.

Driesman

Verkoop hulle dan net motors aan jong swart mense? Ek sien baie wit eienaars,