Regstappe oorweeg ná wit man by kompetisie weggewys word

‘n Skermskoot van die advertensie.

AfriForum Jeug sal moontlik die gelykheidshof nader ná ʼn lid van die organisasie weerhou is om aan ʼn kompetisie van Volkswagen deel te neem omdat hy wit is.

AfriForum Jeug het gesê dat die organisasie Maandagmiddag ’n skrywe aan Volkswagen Suid-Afrika en Volkswagen se hoofkantoor in Wolfsburg, Duitsland, gerig het rakende ʼn onlangse advertensie waarin Volkswagen jongmense aanmoedig om aansoek te doen en deel te neem aan ’n kompetisie om ’n Volkswagen-renjaer te word.

Die advertensie is 17 April op Volkswagen Motorsport se amptelike Facebook-blad geplaas.

JP Peens, ’n lid van AfriForum Jeug wat wou aansoek doen, is nie tot die kompetisie toegelaat nie omdat hy wit is. Henk Maree, hoof van AfriForum Jeug, het aan Maroela Media gesê Peens is tans besig om sy vakleerlingskap by Volkswagen te doen om ʼn paneelklopper by hulle te word.

“Hy het ons gekontak die dag wat die advertensie op Facebook geplaas is. Ons het vir hom gesê indien dit naby is, moet hy gaan probeer. Hy het ons toe ná die uitdunronde in Kaapstad 21 April laat weet hulle het by die geleentheid vir hom gesê hy mag nie deelneem nie omdat hy wit is.”

Dié kompetisie bied aan jongmense die geleentheid om ʼn Volkswagen-renjaer te word. Onder die vereistes wat in die advertensie uitgestippel word is dat die persoon tussen 16 en 24 jaar oud moet wees, ʼn persoon van kleur moet wees en nie ʼn renbaanlisensie van nasionale motorsport Suid-Afrika (MSA) moet hê nie.

Peens het gesê hy is bitter teleurgesteld in die manier hoe Volkswagen Motorsport die situasie hanteer het. “Ek is ’n ondersteuner van Volkswagen Motorsport en ry self ook ’n Volkswagen. Ek het gehoop dat die kompetisie my die geleentheid sou kon gee om ’n loopbaan as ’n VW-renjaer te begin, maar omdat ek nie van kleur is nie, word ek daardie geleentheid geweier.”

AfriForum Jeug vra in hul skrywe aan Volkswagen vir antwoorde oor die kwessie en eis dat die raskriteria vir die kompetisie afgeskaf moet word sodat jongmense wat wil inskryf op gelyke voet kan meeding.

“Vir etlike jare is swart ekonomiese bemagtiging en transformasieteikens gebruik om teen wit jongmense te diskrimineer, nou word daar blatant nóg verder teen wit jongmense in hierdie advertensie gediskrimineer. Ons kan nie staan en toekyk hoe wit jongmense slegs op grond van hul velkleur nie dieselfde geleenthede as ander groepe gegun word nie,” het Maree gesê.

AfriForum Jeug het laat hoor hulle is van voorneme om Peens by te staan en die gelykheidshof te nader indien Volkswagen nie hul “rasgebaseerde toelatingsvereistes” vir hierdie kompetisie binne ʼn redelike tyd laat vaar nie.

“Dis regtig ʼn goeie kompetisie. Ons wil regtig die ou help, ons wil nie net ʼn groot bohaai in die media maak nie,” het Maree gesê.

Matt Gennrich, woordvoerder van Volkswagen Suid-Afrika, het op navraag van Maroela Media gesê dit is Volkswagen se derde aanbieding van hul Driver Search-program. “[Die kompetisie] is van die begin af opgestel as ʼn manier om waarde toe te voeg tot die breër Suid-Afrikaanse samelewing deur die kwessie van transformasie in sport aan te spreek, ʼn kwessie waaroor ons passievol is en bewus is van sport se kwesbaarheid vir finansiële uitsluiting.”

Gennrich het gesê gegewe die onvermydelike historiese nalatenskap van die Suid-Afrikaanse samelewing is hulle oortuig dat hul benadering die mees direkte en geloofwaardige metode is om multi-kulturele verteenwoordiging in sport te bespoedig om die sport se volhoubaarheid te verseker.

“Sedert demokrasie in 1994 wys Volkswagen die weg aan – onlangse voorbeelde sluit Black Owned Supplier Day en die Ntinga-projek in wat gemik is op maatskappye in swart besit om ons verskaffersbasis uit te brei. Dus is ons Driver Search-program wat tans in die eerste fase is beperk tot mense van kleur en strook dit met Volkswagen SA se strategie om as leier in die industrie gesien te word wanneer dit by transformasie kom.”

Gennrich het gesê VW Motorsport bespreek tans hul plan vir die volgende drie jaar en fase twee van die program.

“Ons sal die lesse van die huidige program in ag neem. Ons het die sterk- en swakpunte in ag geneem en sal dit selfs nog beter maak in die toekoms. Ons doelwit is om platforms te verskaf om motorsport in ons nasie te bou oor alle geslagte en rasse heen. Dit kan motorsport in Suid-Afrika net ʼn beter plek maak.”

Intussen het sosialemediagebruikers behoorlik uitgevaar teen die plasing op Facebook en honderde kommentare oor die kwessie is gelewer. Sommiges het selfs gedreig om hul Volkswagen-motors in te ruil of bestellings vir motors te kanselleer.

“Hierdie is blatant rassisties en teen die wet”, lui een van die inskrywings. “Julle het erken dat julle teen witmense diskrimineer”, lui ʼn ander.

Talle mense het voorgestel dat die kompetisie op ʼn 50/50-basis vir almal beskikbaar gestel word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

93 Kommentare

jongste oudste gewildste
kobus

As ek wedren reel net vir wit mense dan is ek n rassis maar as hulle n wedren reel vir mense van kleur is hulle nie rassiste nie.hoe lank gaan dit nog aangaan.Spur hier kom ons

Koos

Daar het ek ook my antwoord. Sal nooit in my lewe n VW aanskaf of op my erf toelaat nie.

Dolla

Niks is meer n skok in die land nie….ekt ongeveer so n jaar terug aansoek probeer doen by die SAPD as n klerk. Het my CV persoonlik by kantore gaan ingee en die vrou het reguit vir my gese “ek is te wit, Hoekom probeer ek nie eerder vir konstabel nie?”

Bennie

Kan jy nou dink wat sou gebeur het as die advertensie gelui het ” slegs blankes”. Dan was daar weer ‘n donderstorm!!!! Absurd!!!!

O aarde

Volkswagen = Voorheen Benadeelde Wa.
Dus nie meer ‘n VW nie, maar ‘n VBW.