’n 46-jarige man is in hegtenis geneem nadat die owerhede by die OR Tambo-lughawe in Kempton Park Donderdag op ses stukke renosterhoring beslag gelê wat tussen sjokoladestafies versteek was.
Die pakkie is glo as Ferrero- en Cadbury-sjokolade verklaar en was op pad na China.
Lt.kol. Philani Nkwalase, woordvoerder van die Valke, sê die owerhede het inligting van die lughawe se vragafdeling ontvang omtrent ’n verdagte pakkie wat vir die Shandong-provinsie in China bestem is.
Lede van die Valke sowel as amptenare van die departement van landbou, bosbou en visserye is toe na die lughawe waar ’n sekuriteitsbeampte wat die skandeerders by die lughawe bedryf, hulle van ʼn verdagte pakkie in kennis gestel het.
Die pakkie is ondersoek en daar is ses stukke renosterhoring in twee bokse met Lunch Bars gevind.
Verdere ondersoek het die owerhede na ’n 46-jarige man gelei. Dié is toe in hegtenis geneem. ’n Onbekende bedrag geld is onder die bestuurdersitplek van sy voertuig versteek gevind.
Nkwalase sê die verdagte sal Dinsdag in die plaaslike hof verskyn op aanklag van die oortreding van die Nasionale Omgewingsbestuur en Biodiversiteitwet (Nemba).