Polisie in Phalaborwa, Limpopo, is op soek na vermeende stropers wat Dinsdag en Woensdag twee renosters in ʼn plaaslike wildreservaat afgemaai het. Die wildreservate is naby die Swelane-nedersetting.
“Daar word beweer dat plaaswerkers die omgewing Dinsdag om 15:00 gepatrolleer het toe hulle op een van die renosters se karkasse afgekom het. Dit wil voorkom of die stropers gesteur was, want hulle het nie daarin geslaag om die horing van die karkas te verwyder nie,” sê kol. Moatshe Ngoepe, polisiewoordvoerder in die provinsie.
Die polisie is die volgende dag ontbied na ʼn ander plek in dieselfde reservaat, waar hulle op nóg ʼn renosterkarkas afgekom het, dié keer met die horing verwyder.
“Die verdagtes in albei die voorvalle is steeds onbekend en niemand is nog in hegtenis geneem nie. Die ondersoek en soektog na die verdagtes duur voort,” sê Ngoepe.
Die polisie vra dat enigiemand met inligting wat tot die inhegtenisneming van die verdagtes kan lei, vir kapt. Peter Meyer op 082 319 9460 kontak.
Dis so hartseer. As jy deesdae ‘n renoster sien het hy nie meer horings nie. Ons kleinkinders gaan ook maar net die ware jacob in ‘n storieboek kan sien.