Restaurantbestuurder toegesluit oor ‘nie-alkoholiese’ drankies

Kringtelevisie materiaal wys hoe die kroegman ‘n nie-alkoholiese jenewer vir die klant ingooi (Foto: Skermgreep)

Die bestuurder van ʼn bekende restaurant in Pretoria is Vrydag agt ure lank in ʼn polisiesel aangehou nadat hy glo nie-alkoholiese drankies bedien het. Die polisie was oortuig dat die drankies alkohol bevat. Nou wil dié bestuurder en die eienaar van die restaurant ʼn siviele eis teen die polisie indien omdat hulle voel dat die inhegtenisneming onregverdig was.

Atrayo Nolte (31), bestuurder van Hennie’s Moreleta Restaurant, is Vrydag in hegtenis geneem nadat polisiebeamptes aangedring het dat hy sy klante jenewer, wat alkohol bevat, bedien het. Nolte het aan Maroela Media bevestig dat dit nie-alkoholiese jenewer was, aangesien die verkoop of verspreiding van alkohol deur die huidige vlak 3-regulasies verbied word.

Hennie’s is deel van ʼn franchise wat die Afrikaanse komediant Jonathan (Rikus de Beer) na sy hond vernoem het.

Nolte vertel ‘n klant het laat die oggend in die restaurant ingekom om iets te eet. Hy het die kroeg genader en aangedring dat die kroegman vir hom ʼn alkoholiese drankie moet bedien.

“Ons het dit aan die man duidelik gemaak dat ons nie alkohol verkoop nie. Hy het toe ʼn nie-alkoholiese jenewer bestel en aangedui dat ons dit vir hom moet ‘lekker’ maak,” vertel Nolte.

“Ons kroegman het vir die klant ’n nie-alkoholiese drankie ingegooi en bedien.”

Volgens Nolte het twee polisiebeamptes, wat nie polisie-uniforms aangehad het nie, daarna in die restaurant ingestap.

“Hulle het nie die Covid-19-register by die deur ingevul nie en het ook nie hul temperature laat meet nie.”

Nolte sê hulle het reguit op hom afgestap en gevra waar die drank is.

“Hulle was oortuig dat ons vir die klante alkoholiese jenewer bedien. My personeel het vir hulle die leë bottel, waarin die nie-alkoholiese jenewer was, gewys. Hoe meer ons hulle probeer verseker het dat ons nie-alkoholiese drankies bedien het, hoe meer het hulle ons nie geglo nie. Hulle het toe gevra waar ons die drankvoorraad stoor.”

Nolte het vir die polisie gesê dat die drankvoorraad toegesluit is in die stoor.

“Hulle wou weet waar die stoorkamer is.”

Volgens Nolte het die polisie aangedui dat hulle al die drankvoorraad in die stoor gaan konfiskeer. Die drank is toe in hul voertuig ingelaai.

“Hulle het my beveel om na Garsfontein-polisiestasie te gaan om ʼn verklaringsvorm vir die gekonfiskeerde drank te onderteken. By die polisiestasie is ek egter in hegtenis geneem en in ʼn sel saam met ander gevangenes geplaas.”

Nolte vertel dat geen Covid-19-protokol by die polisiestasie van toepassing was nie.

“In die rukkie wat ek daar was, was niks ontsmet nie. Niemand het gevra dat ek ʼn Covid-19-vorm moet invul nie en my temperatuur is ook nie gemeet nie. Nie een van die gevangenes in die sel het ʼn masker aangehad nie.”

Nolte is die aand omstreeks 22:00, na agt uur wat hy in die sel aangehou is, op borgtog van R2 000 vrygelaat.

Hy is aangekla van die oortreding van die Rampbestuurswet en het Dinsdag by die Hatfield-landdroshof opgedaag waar sy saak aangehoor sou word.

Volgens Lumka Mahanjana, woordvoerder van die Nasionale Vervolgingsgesag (NVG) se Noord-Gautengse streek, is die saak egter nie eers op die hofrol geplaas nie, omdat daar nie genoeg konkrete bewyse teen Nolte was nie. Die staatsaanklaer het ook aangedui dat Nolte nie ʼn kriminele rekord teen hom sal kry nie.

Nolte en die eienaar van Hennie’s Moreleta Restaurant, Werner Pretorius, het aangedui dat hulle egter nie die saak daar gaan laat nie en wil ʼn siviele eis teen die staat indien.

“Die polisie het my ʼn krimineel gemaak vir ʼn oortreding wat ek nie begaan het nie. Ek het niks verkeerds gedoen nie – ek het nie eers die drankie, wat nie-alkoholies is, ingegooi en bedien nie.”

Maroela Media het ʼn navraag aan die woordvoerder van die Gautengse polisie gerig, maar wag nog op terugvoer.