Duisende hektaar grond is in ʼn reusebrand wat Saterdag in die Barkley‑Wes-omgewing in die Noord-Kaap uitgebreek het, verwoes.
Boere spook steeds om die vlamme in bedwang te bring en die brand het Dinsdag steeds voortgewoed.
Groot gedeeltes grond van die bekende Mattanu-wildreservaat, sowat 17 km van Barkley‑Wes, het ook in die brand deurgeloop.
Volgens Jacques Kriek, eienaar van die wildreservaat, het hy Saterdag omstreeks 16:30 rook in die rigting van Windsorton gesien. Hy sê die brand het sowat 15 km buite Barkley‑Wes in ʼn veld uitgebreek.
Dit is in hierdie stadium nog onduidelik wat die brand veroorsaak het.
“Boere van die omgewing het gejaag om die brand te help blus. Ons het dit van Saterdagmiddag in bedwang probeer bring, maar die brand het weens die sterk noordwestewind handuit geruk,” sê Kriek.
“Talle boere van die omgewing en brandbestryders het heelaand gespook om die brand te blus. Ons het gehoop die wind gaan lê deur die loop van die aand om vir ons ’n blaaskans te gee, maar dit het nie. Die brand het in ’n suidwaartse rigting – in die rigting van Holpan – versprei.”
Teen Sondag vroegoggend het die wind in ’n suidoostelike rigting gedraai en heeldag gewaai.
“Teen Sondagmiddag het die brand na Mattanu se rigting versprei en teen Maandag omstreeks 10:00 het die wind die vlamme na die wildreservaat gewaai. Ons het bakkies en ’n stootskraper gebruik om die brand te keer, maar ons kon dit nie bedwang bring nie.”
Kriek sê hulle het in 2010 sproeiers by hul gaste-eenhede se grasdakke aangebring, juis om te verhoed dat die huise in die slag bly wanneer ʼn brand uitbreek. Dit het gehelp dat geen infrastruktuur deur die brand beskadig is nie.
Volgens Kriek is ongeveer 2 300 ha van die wildreservaat se grond in die brand verwoes. Hy sê geen van hul wild is dood of beseer nie.
“Dit is die Here se genade dat ons wild gespaar is.”
Teen Maandagaand is die brand by die wildreservaat in bedwang gebring en daar het vroeër vandag steeds brande om die reservaat by buurplase gewoed en versprei.
“Dit was ’n massiewe brand en duisende hektaar grond is afgebrand.”
Kriek sê die streek se goeie reënvalseisoen en die ruie gras saam met die wind, het veroorsaak dat die brand aanhou versprei.
“Die wind gaan lê gewoonlik in die aande, maar die afgelope naweek het die wind heeltyd stormsterk gewaai.”
sekerlik weer ‘n gestigde brand, wat anders
Die brandstigters moet opgespoor en uit die samelewing verwyder word. Dit raak nou al amper normaal om te hoor van derduisende hektaar weiding en veld wat in vlamme opgaan, maar mens hoor nooit van die inhegtenisname van die vernielsugtige spesie nie! Nonsens man! Kry lewe!!
Wie was al vervolg vir Brandstigting??
Omdat ons almal in n skeptiese tyd leef kan dit net brandstigting of nalatigheid wees. Die een is strafbaar en die ander verskoonbaar of hoe?