Ricoffy, Frisco, Koffiehuis dalk nie meer koffie nie

Volgens nuwe konsepregulasies deur die departement van landbou, grondhervorming en landelike ontwikkeling kwalifiseer Ricoffy, Koffiehuis en Frisco nie as koffie nie, omdat dit nie aan die nodige kriteria van régte koffie voldoen nie.

Die departement het onlangs die eerste konsep van “regulasies wat verband hou met koffie, sigorei en verwante produkte wat in Suid-Afrika verkoop sal word” vir kommentaar beskikbaar gestel. Dit klassifiseer wat as koffie verkoop sal mag word.

Volgens dié konsepregulasies is daar verskillende kategorieë van koffie, sigorei en verwante produkte. Dít wissel van suiwer koffie tot suiwer sigorei, en sluit gemengde koffie en koffiemengsels in wat minstens 75% koffie moet wees.

In die kategorie vir “koffie-en-sigoreimengsels” moet die mengsel uit minstens 50% koffie bestaan en die kafeïeninhoud minstens 0,6% wees. Kitskoffie moet minstens 2,25% kafeïen bevat, terwyl kafeïenvrye koffie tot 0,32% kafeïen mag bevat.

Die konsepregulasies bepaal dat enigiets wat “koffie” genoem word geen kleurmiddels of geurmiddels mag bevat nie. Gemaalde koffie of koffiepoeier moet ook altyd die “eienskappe van koffie bevat”. Kitskoffie moet volgens dié konsep “binne 30 sekondes in kokende water kan oplos” terwyl dit geroer word.

Volgens Business Insider voldoen Koffiehuis, Ricoffy en Frisco nie aan dié vereistes van koffie nie.

Koffiehuis kan hiervolgens nie as koffie beskou word nie, omdat dit glukose bevat. Ricoffy en Frisco kwalifiseer aan die ander kant glad nie as koffie, ʼn koffiemengsel of ʼn koffie-en-sigoreimengsel nie, omdat dit slegs 25% koffie bevat.

Die publiek kan kommentaar lewer op die konsepregulasies tot einde September.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

90 Kommentare

jongste oudste gewildste
Tineke

Dis geen wonder rickkoffie smaak so sleg nie. En dan betaal mens nog ten duurste daarvoor. Eerder ander soort koffie vir my.

Zettie

…….en Ricoffy is dan nou eintlik die enigste “ordentlike” koffie, sonder ‘n nasmaak, wat ek eintlik kan bekostig………..nou wat nou??????

Wielspore

Dit gebeur as iemand niks het om te doen, dink ‘n klomp nonsense uit.
Wat van roomys, dit word al lank al nie meer van room gemaak, Beef patty (Vark en honder) VW / Mercedes Duitse voertuie, onderdele waarvan die voertuig gebou word, word in Indie, Italie, Japan gemaak.
Kry ‘n stokperdjie!

Realis

Uiteindelik!! Daai goed was nog nooit koffie nie, verkoop dit vir wat dit is…plastiek koffie!

JR

Frisco is die slegste koffie wat ek nog gedrink het