Rondloperleeu ‘teen dié tyd weer honger’

Argieffoto. Foto: SANParks

Die rondloperleeu wat verlede maand uit die Karoo Nasionale Park naby Beaufort-Wes in die Wes-Kaap ontsnap het, het in die afgelope week nog nie weer prooi platgetrek nie en behoort teen dié tyd weer honger te wees.

Só sê Reynold Thakuli, woordvoerder van SANParke.

Die leeumannetjie het sowat tien dae gelede ʼn eland op ʼn plaas aangrensend aan die park gevang. Sedertdien is daar egter nog geen oorskot van ander prooi in die gebied aangetref nie.

Volgens Thakuli sou tekens van nog prooi in die soekgeselskap se guns kon tel en help om op die leeu se spoor te bly.

Spoorsnyers het wel gister nuwe inligting ontvang oor waar die leeu hom mag bevind. Thakuli vertel dat ʼn vars spoor op ʼn plaas, sowat 60 km van die park, in ʼn noordelike rigting opgemerk is.

Dié plaas is in die teenoorgestelde rigting van die dorp geleë, bevestig Thakuli.

Spoorsnyers het die omgewing tot ná donker gefynkam waarna die soektog vanoggend hervat is. ʼn Veearts loop tans saam op die spoor ingeval hulle die dier opspoor en die geleentheid kry om die leeu te verdoof.

Spoorsnyers meen op grond van die enkele oomblikke wat hulle die rondloperleeu onder oë gehad het dat dié leeu ʼn twee en ʼn half jaar oue mannetjie is.

Maroela Media het vroeër berig die leeu het op 15 Februarie uit die park ontsnap nadat swaar reënval veroorsaak het dat grond onder die heining weggespoel het. Die leeu het glo onderdeur die heining gekruip.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

10 Kommentare

jongste oudste gewildste
KP

Wonder maar net kan hulle nie vir hom vars karkas uitsit en dit dophou om hom miskien te lok nie?? Leeu se reuksintuig is mos baie skerp.

HPV

Maak jag oop vir jagters en boere op die leeu. Die dier is ‘n bedreiging vir mense en is nie ‘n bedreigde spesie nie. Hoe hongerder hoe gevaarliker, of moet dit eers ‘n mens dood? Jagters sny spoor en jag ook op hul eie koste, jaggewere is ook meer doeltreffend as “dart”gewere oor lang afstande.

Jepetto

Hy moet maar vir hom a lekker Karoo lam plat trek

Ellisras

Lees gerus Herman Charles Bosman se : In the Withaaks shade.
Waar hy sê almal weet ‘n koei is nie so klein dat jy regop hoef te staan om dit te sien nie. Toe die Luiperd kom kuier het. Jy sal dit geniet. En almal weet ‘n leeu is nie so klein dat jy sukkel om hom te sien nie.

Willa

My man is die veearts. Hou duim vas, het sy spoor gekry en is oppad met helikopter om vir Juluis te dart. Hopelik kry hul hom vanmiddag, want dis nou al 2 weke se soektog! !!