‘Roof nie motief vir jongmense se skietdood,’ sê Bolhuis

Johanco Fleischmann en Jess Kuhn. (Foto: Facebook)

ʼn Span van Mike Bolhuis se private speurdiens stel ondersoek in na die koelbloedige moord op twee jongmense wat Sondag op Putfonteinweg in Benoni doodgeskiet is toe hulle sonder brandstof gaan staan het.

Bolhuis het Maandag aan Maroela Media gesê sy span is gister aangestel om die moord te ondersoek saam met die polisie se georganiseerdemisdaad-eenheid. “Ons is reeds ver gevorder met ons ondersoek en maak staat op informante. Ons is besig om die motief van die moorde te ondersoek. Ons kan in hierdie stadium slegs bevestig dat dit nie roof was nie,” het hy gesê.

Maroela Media het vroeër berig Johanco Fleischmann (19) en sy vriendin Jess Kuhn (23) is omstreeks 11:00 deur drie mans op die Putfontein-wisselaar oorval en doodgeskiet. Kol. Lungelo Dlamini, woordvoerder van die polisie, het aan Maroela Media gesê die oorledenes is helder oordag oorval nadat hul bakkie se brandstof glo opgeraak en hulle langs die pad gaan staan het. Fleischmann en Kuhn is doodgeskiet voor die aanvallers probeer het om die bakkie aan die brand te steek. Lede van die gemeenskap kon daarin slaag om ʼn brandblusser in die hande te kry om te verhoed dat die bakkie aan die brand slaan. Die verdagtes het vermoedelik met net ʼn selfoon te voet op die vlug geslaan.

Fleischmann se liggaam is met verskeie skietwonde buite sy Toyota Hilux-bakkie aangetref. Kuhn is binne die bakkie gekry. Sy is ʼn enkele keer geskiet. Albei is op die toneel dood verklaar.

Bolhuis versoek die gemeenskap om nie die reg in eie hande te neem nie. “Laat die ondersoekspan toe om die saak behoorlik te ondersoek.”

Enigiemand met verdere inligting oor die voorval word versoek om Bolhuis en sy span te kontak.

“Ons betuig ons innige medelye met die familie en naasbestaandes,” het hy bygevoeg.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

56 Kommentare

jongste oudste gewildste
AmY

Bolhuis is reg.
Dit was nie roof nie, dit was koelbloedige moord op twee jongmense.

Johan Blom

In die buitelandse media word dit as ‘n rassistiese moord berig met die verduidelikings van die werkers oor hoe hulle aangerand is deur die aanvallers en hoe Johanco en Jess mlungu genoem is voor hulle teregestel is. Hoekom word dit nie hier berig nie?

Johan

Hulle vat die selfoon om die omstandighede te versag sou hulle gevang word. Dit is koelbloedige moord in die eerste graad.

Pieter du plessis

Nou weet ek ten minste daar is professioneel ondersoekers en die skuldiges gaan gevang word hierdie rasistiese aanvalle op wit mense moet einde kry.

Stephen Namibia

Nou is die regte persoon in beheer van die ondersoek.
Mike Bolhuis is die beste. Sterkte.