Routydperk, staatsgedenkdiens vir De Klerk

Oudpres. FW de Klerk. (Foto: Phando Jikelo/African News Agency/ANA)

ʼn Vyf dae lange nasionale routydperk sal van Woensdag vir die wyle oudpres. FW de Klerk geld, waartydens die landsvlag ook halfstok sal hang. De Klerk sal ook eersdaags tydens ʼn private diens deur sy familie gegroet word en ook ʼn staatsgedenkdiens ontvang.

Pres. Cyril Ramaphosa het aangekondig dat De Klerk vandeesweek vereer sal word vir sy rol as adjunkpresident in oudpres. Nelson Mandela se regering van nasionale eenheid (RNE).

De Klerk is verlede week by sy huis in Kaapstad dood nadat hy ʼn lang stryd teen kanker verloor het.

Ramaphosa het Dinsdag gesê die landsvlag sal van Woensdag tot Sondagaand halfstok hang.

Die FW de Klerk-stigting het intussen aangekondig dat De Klerk se verassing en begrafnis Sondag tydens ʼn private seremonie vir familielede sal plaasvind.

Die regering het bygevoeg dat hy ook eersdaags ʼn staatsgedenkdiens, eerder as ʼn staatsbegrafnis, ter nagedagtenis van De Klerk sal hou. Dit is egter nog nie duidelik wat die gedenkdiens sal behels nie en die datum is ook nog nie bepaal nie.

Die regering het reeds die stigting en De Klerk se familie geraadpleeg as deel van die voorbereiding vir hierdie geleentheid. Regeringleiers, leiers van politieke partye en verteenwoordigers van burgerorganisasies sal na verwagting ook die geleentheid bywoon.

Die ANC-jeugliga en lede van die EFF het verlede week die idee van ʼn staatsbegrafnis vir De Klerk verwerp en Ramaphosa heelhartig aangeraai om nie daarmee voort te gaan nie.

Julius Malema, leier van die EFF, het glo kort ná Ramaphosa se aankondiging gesê dit is goed dat De Klerk nie ʼn staatsbegrafnis, wat onder normale omstandighede aan huidige en voormalige presidente en adjunkpresidente toegeken word, gaan ontvang nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

30 Kommentare

jongste oudste gewildste
Hein

Ook maar goed dit is nie ‘n staats begrafnis nie. Die EFF sal amok maak en ‘n sirkus van dit maak.

Shakespeare

Diee EFF moet verban word. Jammer dat die ANC nie sal saamstem nie. Die ANC se kleinboet.

Lourens

Dit is reg so. Hy wás ten minste die president van ons land, ek sal dit ook nie volg nie. (Mý keuse)
Ek stem ook saam dat ‘n staats begrafnis in ‘n fiasko en betogings sou ontaard.

marius

Ek rou oor wit en rooi kruise teen ‘n helling in die Verre Noorde . Dis al .

Harley Davidson

Wie se president was hy?