‘Rower’ dood ná skietery by Centurion Mall

Die toneel in die Centurion Mall waar die skietery plaasgevind het. (Foto: Twitter)

ʼn Vermeende rower is dood ná ʼn skietery by Centurion Mall in Centurion vroeg Donderdagaand.

Kapt. Dave Miller, polisiewoordvoerder, het gesê die groep rowers het ʼn winkel in die sentrum beroof. Veiligheidswagte is oor die situasie ingelig en een van die sentrum se wagte het die vier vermeende rowers genader.

Van hulle het hom klaarblyklik gesien naderkom en het losgebrand, het Miller gesê.

Die wag is gewond, maar het teruggeskiet. Een van die rowers is verskeie kere in die bolyf getref en sy makker is in die been gewond.

Miller het gesê dié man het buite die sentrum ʼn voertuig probeer kaap, maar is op die perseel in hegtenis geneem. Hy ontvang tans mediese behandeling.

Die ander vermeende rower is in die ambulans op pad na ʼn hospitaal dood.

“Nog twee verdagtes het gevlug en is steeds op vrye voet. Die polisie volg alle leidrade op,” het Miller gesê.

Polisieondersoekers het die toneel nog tot omtrent 03:00 vanoggend vir bewyse gefynkam. Dit is in dié stadium onduidelik watter winkel beroof is.

Miller het gesê die geld wat geroof is, is op die toneel teruggevind. “Die polisie het ook beslag gelê op twee vuurwapens.” Albei is gesteelde vuurwapens.

“Die veiligheidswag is in ʼn bestendige toestand in ʼn private hospitaal,” het Miller gesê.

Die winkelbestuur het in ʼn verklaring gesê hulle gee hul volle samewerking aan die polisie met die ondersoek.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

48 Kommentare

jongste oudste gewildste
Pieter

Daardie Sekuriteitswag verdien ‘n medalje! Ek hoop hulle sorg mooi vir hom.

Peet

Ag man, goeie nuus so aan die begin van die naweek.

toy

10/10 vir die sekuriteitswag.

Lollie

Pragtig! Wens elke misdadiger loop sy rieme so styf dan sal SA weer ń paradys wees!

Oujongvrou

Ek hoop die wag kry moewiese bonus. Van die sentrum en die winkel. Wel gedaan. Iemand wat sy werk doen.