Rowers loop rieme styf met dié wakker konstabels

Van links na regs, konst. Moses Moshwadiba en konst. Gomolemo David Phiri. (Foto: Verskaf)

Twee polisiemanne wat nie aan diens was nie, en boonop ongewapen, het Woensdag gehelp om vyf gewapende verdagtes buite Brits vas te trek.

Volgens berigte was konst. Gomolemo David Phiri en konst. Moses Moshwadiba omstreeks 15:50 in Mooinooi toe hulle vyf mans uit ʼn selfoonwinkel sien hardloop en in ʼn silwerkleurige Toyota Etios wegjaag. Die polisiemanne het in hul private voertuig die verdagtes agterna gesit terwyl hulle polisie by die omliggende polisiestasies ontbied het.

Polisielede van Brits en Hartbeespoortdam het Phiri en Moshwadiba gehelp om die verdagtes naby Damdoryn voor te keer. Die verdagtes is deursoek en twee pistole, een rewolwer, ammunisie, selfone en kontant is in hul besit gevind.

Volgens kol. Adéle Myburgh, polisiewoordvoerder, het die verdagtes, tussen 25 en 54 jaar oud, glo voorgegee dat hulle belangstel om ʼn selfoon te koop. Hulle het die verkoopsassistent toe van selfone en kontant beroof voordat hulle van die toneel gevlug het.

Die verdagtes sal na verwagting vandag (Vrydag) in die Brits-landdroshof verskyn op aanklag van sakeroof, die besit van gesteelde goedere en die besit van ongelisensieerde vuurwapens en ammunisie.

Lt.genl. Sello Kwena, provinsiale kommissaris in Noordwes, het die betrokkenes bedank vir hul samewerking en veral die twee konstabels wat hul plig na gekom het, al was hulle nie aan diens nie.