Rowers slaan toe op Oos-Rand-polisiestasie

Argieffoto

Vier polisiebeamptes is in ’n aanhoudingsel toegesluit toe ʼn polisiestasie in Eden Park in Alberton aan die Oos-Rand Donderdag in die oggendure beroof is.

Kapt. Lesetja Mathobela, woordvoerder van die polisie, het gesê die voorval het omstreeks 00:30 plaasgevind.

“Vier polisiebeamptes, almal vroue, was aan diens toe twee mans by die stasie ingeloop het en gemaak het of hulle hulp verlang,” het Mathobela gesê.

Volgens Mathobela het een verdagte toe oor die toonbank gespring en ʼn beampte met ʼn mes gedreig en die kluis se sleutels geëis. Hy het haar na die kluis geneem waar hy een R5-geweer en twee magasyne gesteel het.

“Die twee het toe drie van die beamptes in die aanhoudingselle toegesluit en in ʼn voertuig van die toneel gevlug. Die ander beampte het onder ʼn tafel geskuil en kon daarin slaag om die beamptes te bevry en alarm te maak.”

Volgens Mathobela is daar ʼn vermoede dat die twee in ʼn wit bakkie van die toneel gevlug het, maar dit kan nie in dié stadium bevestig word nie. Hy sê deskundiges is tans besig om die toneel te fynkam vir leidrade.

Niemand is tydens die voorval beseer nie en niemand is nog in hegtenis geneem nie.

ʼn Saak van gewapende roof word ondersoek.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

43 Kommentare

jongste oudste gewildste
Nossob

Dis belaglik. Dalk moet die polisie iemand aanstel om hulle op te pas????

gatiep

Die polisie sal maar security moet kry om hulle op te pas.
Dis so moeilik om te glo dat so iets moonlik is eat gebeur het.

Wors

Wettelose land. Die wat kan, neem nou oor sonder skaamte.

Eish

Tragies!
Ek weet nie of ek moet lag of huil nie.
Die dames is dan lankal ge-emansipeer om n man se werk te doen, dus maak dit die skande presies dieselfde.
Hierdie uitrafeling van die gemeenskap en strukture is uit en uit n leierskapsprobleem. Iets waaraan die huidige meerderheidsregering mank aan gaan.

Matt

Hier word ‘n rot geruik. Vier beamptes word deur twee rowers, een wat met ‘n mes oor die toonbank spring en een beampte neem om die kluis oop te sluit. Die ander rower bly dus agter saam met die drie ander beamptes. Drie word in die aanhoudingselle toegesluit en later deur een gered wat onder die lessenaar wegkruip???? Wanneer het die een beampte die ander rower ontglip om onder die lessenaar in te kruip en was die rowers so onnosel dat hulle vier aantref en net drie toesluit? Wonder maar net!!!