Rowers slaan toe op plaas naby Gravelotte

(Foto: Heritage Protection Group/Facebook)

Twee plaaswerkers is Woensdag in die Gravelotte-omgewing in Limpopo oorval toe vier rowers op die plaas toegeslaan het.

Marius Müller, nasionale operasionele koördineerder van AfriForum, het gesê die werkers is oorrompel waarna drie van die verdagtes na die hoofhuis is waar hulle vuurwapens op die plaaseienaar en sy vrou gerig het.

Die verdagtes het kontant, selfone en skootrekenaars gebuit. Daar was geen wapens in die kluis nie, het Müller gesê.

Na verneem word, het die rowers se wegkommotor onklaar geraak nadat hulle op die plaas weg is, en hulle het te voet verder gevlug. Die motor is verlate in die omgewing gevind. Lede van Heritage Protection Group het die vermeende aanvallers se spore nagenoeg 25 km ver gevolg en alle leidrade wat hulle kon insamel aan die polisie oorhandig.

Maroela Media het ʼn navraag aan die polisie in Limpopo gerig en wag op terugvoer.

• Die berig is gewysig sedert dit aanvanklik gepubliseer is. – RED