Rugbyheld daar toe hy bykom in hospitaal

Erik Viviers (16), ʼn gr. 11-leerling aan die Hoërskool Noordheuwel in Krugersdorp, sterk nog in ʼn hospitaal in Durban aan, nadat hy ernstig beseer is in ʼn rugbywedstryd.

Viviers het op Saterdag 2 April tydens ʼn rugbybyeenkoms in Durban vir sy skool se eerste span uitgedraf, toe hy tydens ʼn duikslag ʼn kopbesering opgedoen het. “Ons is nog nie 100% seker wat gebeur het nie, maar hy is van die veld af en toe hy by die plaasvervangerbank kom, het hy ineengestort en ʼn epileptiese aanval gekry,” het Christo Viviers, Erik se pa, aan Maroela Media gesê.

Volgens Christo is sy seun onmiddellik na die St. Augustine-hospitaal geneem, waar ʼn skandering gedoen is. “Hulle het gesien daar is aan weerskante bloeding op sy brein. Ek en my vrou was nog van Krugersdorp af op pad Durban toe, toe die dokter gebel en gevra het of hy kan opereer. Hulle het ʼn gedeelte van sy skedel verwyder, ʼn snit in sy maagvel gemaak en dit daar gebêre. Hy sal later weer geopereer word om die deel van sy skedel terug te plaas.”

Erik gebruik tans medikasie vir die epilepsie, wat matige geheueverlies veroorsaak. “Ons sal oor ses maande eers werklik kan terugkyk en sê wat hy van die besering oorgehou het. Dit is egter nie te betwyfel dat hy ʼn wonderwerk is nie. Hy onthou sy maats se selfoonnommers en herken stemme op die foon.”

Hy het sedert die besering nog nie opgestaan nie, maar is nie verlam gelaat weens die besering nie. “Hy sal van voor af moet begin loop, maar hy lyk goed. Dit is net gebede. Na die operasie is hy onder verdowing gehou. Op dag drie in die hospitaal het hy my hand die eerste keer ʼn ligte drukkie gegee. Ek het hom gevra om dit weer te doen en hy het. Op dag vyf het hy weer my hand ʼn drukkie gegee, al was hy onder verdowing. Op dag 13 was sy oë oop en toe ek instap sê hy: ‘Hallo pa’.”

Dit was ook op dié dag wat een van Erik se rugbyhelde, die oud-Bokkaptein John Smit, hom in die hospitaal besoek het. Die besoek is deur die Chris Burger Petro Jackson Rugbyspelersfonds gereël. Die fonds verskaf bystand aan slagoffers van katastrofiese rugbybeserings en bevorder bewustheid van rugbybeserings. Smit is een van die fonds se ambassadeurs. Erik het ʼn paar dae later nog ʼn verrassing gekry, toe Patrick Lambie, Jacques Potgieter, Tera Mtembu, Ruan Botha en Christiaan de Bruin hom ook in die hospitaal besoek het.

“Hulle besef nie wat dit vir hom beteken nie. Die tyd wat hulle opoffer, verander ʼn kind se uitkyk en maak hom weer positief oor die lewe. Ek haal my hoed af vir wat hulle doen,” het Christo gesê. Volgens hom het die fonds hulle gekontak en ook ander bystand aangebied.