Rustenburg-man ernstig beseer tydens vulstasie-aanranding

Jan Minnaar na die aanval (Foto aan Maroela Media verskaf deur die familie)

Jan Minnaar na die aanval (Foto aan Maroela Media verskaf deur die familie)

Jan Minnaar (68) van Modderfontein-kleinhoewes buite Rustenburg in Noordwes het ernstige beserings opgedoen toe twee mans hom by ʼn vulstasie buite die dorp aangerand het.

Liza Fitchat, Minnaar se dogter, het gesê die voorval het Vrydag by Jabes Motors buite Rustenburg plaasgevind.

Minnaar het sy twee kleinkinders, ʼn seun van 11 jaar en ʼn dogtertjie van 3 jaar oud, by die skool gaan haal toe hy by die vulstasie stilgehou het om koeldrank te koop. “Hy het gesien hoe drie mans op twee vroue, wat kinders in hul motor gehad het, skree en intimideer. My pa het vir die twee vroue gesê hulle moet ry om weg te kom,” het Fitchat verduidelik. “Terwyl my pa ook stadig begin het om weg te ry om seker te maak die vroue kom veilig weg, het een van die mans by my pa ingespring en hom geslaan. ʼn Tweede man het toe ook by my pa in die motor gespring en hom begin slaan. Volgens omstanders het dit gelyk of die man ʼn slaansak slaan, hy het onophoudelik aanhou slaan.”

Minnaar kon uiteindelik wegkom en kon self tot by sy huis op die kleinhoewe ry. Hy het by die buurvrou se huis stilgehou, omdat hy die twee kinders in die motor gehad het en niemand by sy huis was nie. Fitchat en haar ma, Corrie Minnaar, was in die dorp en die buurvrou het hulle ontbied. “Toe sy sê my pa is aangeval, was ons aanvanklik besorg dat dit ʼn plaasaanval is. Ons weet nie hoe my pa tot by die huis gery het nie. Dis ʼn wonderwerk dat hy leef.”

Minnaar is in die hoësorgeenheid van die hospitaal opgeneem en moet Maandag geopereer word. “Sy twee wangbene is gebreek en daar moet plate ingesit word. Sy neus en sy oogbeen is ook gebreek.”

Fitchat het gesê hulle is dankbaar dat haar pa nie enige swelling of bloeding op die brein het nie. “Al die houe was in sy gesig.”

Die gesin en die polisie het beeldmateriaal van die voorval. Foto’s van die aanvallers is aanvanklik op sosiale media gedeel, maar die polisie het die gesin versoek om dit te verwyder, uit vrees dat die gemeenskap reg in eie hande sal neem.

“Ons wil net hê die mans moet in hegtenis geneem word sodat die gereg sy gang kan gaan,” het Fitchat bygevoeg. “Hulle moet boet vir dit wat hulle gedoen het. Ons wil net hê geregtigheid moet geskied.”

Volgens Fitchat was die mans glo vroeër in die dag ook by Philip Motors in ʼn onderonsie betrokke. “Dit lyk of hulle net daarop uit was om die hele dag lank moeilikheid te maak. Ons vermoed hulle is dalk nie inwoners van Rustenburg nie, anders sou iemand hulle dalk al herken het.”

Die kleinkinders wat saam met hom in die motor was, is Minnaar se seun se kinders. Hy en sy vrou is tans in Kaapstad.

Fitchat se sussie is die countrysangeres Mari Minnaar. Sy het gisteraand nog ʼn optrede gehad.

Lt.kol. Pelonomi Makau, woordvoerder van die polisie, het die voorval aan Maroela Media bevestig. Sy het gesê die polisie ondersoek ‘n saak van aanranding met die doel om ernstige liggaamlike skade aan te rig. Niemand is nog in verband met die voorval in hegtenis geneem nie. “Die mans het ná die voorval weggery. Hulle motor het ‘n Gauteng-nommerplaat.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

35 Kommentare

jongste oudste gewildste
Charmaine

Jammer dat die oom so seer gekry het,net omdat hy ander se veiligheid verseker het.Die omstanders het hom egter gefaal,neem liefs video’s maar sit nie n hand by om hom he help.Dankie oom dat daar mense soos jy is wat omgee,alle sterkte aan julle en die kleinkinders.

Mel

Flippen lafaards!!!

antoinette

Ag nee wanneer gaan die aanvalle begin
stop.Sterkte word gou gesond.Hoekom het daar nie iemand gaan help nie maar neem foto ens.Baie teleurgesteld aan die mense wat alles sien gebeur en niks doen nie.

Peet

Maroela! Hou ons asb op hoogte met wat vorentoe gebeur. Ek wil sien hoe hierdie belhamels hulle loon kry…indien enige. Ek hoop Oom sterk gou aan. Jammer die kinders moes dit deurgaan en waar is die staat nou met berading en bystand??????

John

En die polisie vrees dat die gemeenskap reg in eie hande sal neem. Dit is die gemeenskap se reg om hulle self te beskerm, want polisie te sleg.