SA Express-vlugte opgeskort ‘weens wanbestuur, onbevoegdheid’

SA Express (Foto: Facebook)

Die VF Plus het Donderdag gesê wanbestuur, onbevoegdheid en korrupsie is die hoofredes waarom SA Express se vlerke Donderdag sonder seremonie geknip is.

Die Suid-Afrikaanse Burgerlugvaartowerheid (BLO) het Donderdag met onmiddellike inwerkingtreding alle vlugte van SA Express opgeskort.

Dié owerheid het in ʼn verklaring gesê dit volg nadat daar “oorweldigende bewyse” aan die lig gekom het dat die lugdiens nie aan veiligheidsmaatreëls voldoen nie. Die BLO het SA Express se operateursertifikaat en onderhoudpermitte teruggetrek, asook die lugwaardigheidspermitte van nege van die lugdiens se 21 vliegtuie.

Volgens die BLO volg dié ingrypende besluit nadat die owerheid die afgelope paar dae ʼn oudit by die lugredery en sy instandhoudingsorganisasie gedoen het. Die owerheid sê erge gevalle van nienakoming van regulasies wat ernstige veiligheidsrisiko’s inhou, het aan die lig gekom. Die BLO het gesê as beskermheer van lugvaartveiligheid in die land kan die owerheid nie ʼn blinde oog draai wanneer daar “oorweldigende bewyse” is dat daar nie aan veiligheidsmaatreëls voldoen word nie.

Wouter Wessels, die VF Plus se parlementêre woordvoerder vir die tesourie, het gesê die vraag moet gevra word hoe lank die bestuur van die lugdiens bewus was van gebrekkige onderhoud aan die vliegtuie, maar steeds toegelaat het dat die vliegtuie bedryf word met groot risiko vir sy passasiers.

“Die finansiële krisis van SA Express wat direk tot die swak toestand van hul vliegtuie gelei het, is veroorsaak deur jarelange swak bestuur. SA Express en SAL is tans geensins finansieel volhoubaar nie en is slegs ʼn geweldige las vir die belastingbetaler,” het hy gesê.

“Die regering moet gereeld vir albei staatsentiteite se skuld borg staan en miljarde rande se belastinggeld bestee aan reddingspogings. Hierdie ondernemings het geen winsmotief nie, aangesien hulle altyd deur die staat gered word.”

Wessels sê die VF Plus is van mening dat dié staatsentiteite geprivatiseer moet word.

Volgens hom gaan die beoogde samesmelting van die SAL, SA Express en Mango nie die entiteite red nie.

“Dié samesmelting gaan eerder tot groter agteruitgang lei, veral tot nadeel van Mango wat tans die suksesvolste van die drie is,” het hy gesê.

SA Express se opskorting beteken in effek dat die lugredery van Donderdag af nie meer as ʼn lugdiens mag dienste lewer nie. Indien SA Express weer sy vlerke wil sprei, sal die lugredery van voor af moet aansoek doen vir die betrokke goedkeuring, insluitend ʼn bedryfsertifikaat, goedkeuring vir vliegtuiginstandhouding en lugwaardigheidspermitte vir die vliegtuie waarvan die permitte teruggetrek is.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

22 Kommentare

jongste oudste gewildste
Rugga007

Ek vlieg ten minste twee keer n maand tussen Bloemfontein en Johannesburg, glo my die diens is absoluut pateties, moet gereeld sit met vertragings of kanselasies,moes twee maande terug oorslaap oor vlug wat gekanselleer is,sonder verduideliking hoekom.

Hendrik vd Westhuizen

Nee wat, ek is glad nie verbaas nie
Ek dink ons moet in elk geval al wat ‘n ” SAL verwante redery” boikot want jy dink jy betaal ‘n goeie prys vir n vliegtuigkaartjie maar waar kom die R5 000 000 000 (5 miljard rand) vandaan wat elke jaar ge-eis van die belastingbetalers af om SAL in die lug te hou.
Ons het in effek al betaal vir die volgende 10 vlugte.

Boeta

Hulle het al hulle vlerke lankal self geknip. Gaan sit op OR Tambo en kyk hoe min van hulle vlugte is betyds, omtrent niks!!!

Ronelle Mulke

Ek het Saterdag vanaf Johannesburg na Kimberley gevlieg met SA express en was hoogs onsteld toe ek gaan navrae doen oor die inboek van ń ekstra tas en daar vir my aangesê is om teen ń “spesiale prys” R200 in my paspoort te sit en vir hom aan te gee. Ek het geen bewys ontvang nie en kan net dink waarheen daardie geld gegaan het.

Oom Kalahari

@ Ronelle Mulke, dit wat jy moes doen is die norm by Staats instellings. So word elke Staats instansie se vlerke kort geknip met goeie goue handdrukke en die nuwe aanstellings knip die vlerkies net beter en meer ge-organiseerd.