SA Jagters gereed vir regsgeding teen vuurwapenwet

Foto ter illustrasie. (Foto: Maxim Potkin, Unsplash)

Die Suid-Afrikaanse Jagters- en Wildbewaringsvereniging (SA Jagters) meen dat die omstrede wysigingswetsontwerp op vuurwapens wat in Mei vanjaar gepubliseer is, onprakties, onregverdig en onuitvoerbaar is.

Hierdie vereniging is in 1949 gestig en is die oudste en die grootste geakkrediteerde jag- en sportskietvereniging in Suid-Afrika met meer as 44 000 lede en 81 funksionele takke.

Fred Camphor, uitvoerende hoof van SA Jagters, sê hulle is sterk ten gunste van wettige vuurwapenbesit, maar dat hierdie konsepwet aanvaarbare perke oorskry. “Uit die voorgestelde veranderinge is dit duidelik dat hierdie konsepwetgewing vanaf die aanvang ontwikkel is om die wet te verander van beperk tot beperkend.”

Maroela Media het onlangs berig dat die wysigings wat in die wetsontwerp voorgestel word, onder fel kritiek van verskillende belanghebbendes in die bedryf gekom het. Een van die belangrikste bekommernisse is die ingrypende gevolge wat Suid-Afrikaners byvoorbeeld die reg ontsê om ’n vuurwapen te besit vir selfverdediging of om ammunisie te herlaai.

Volgens Camphor is daar talle ander voorgestelde wysigings aan dié wet wat as onprakties en onregverdig beskou word.

“Die belangrikste beperking wat van toepassing op ons lede is, is dat toegewyde jagters en sportskuts tot ’n maksimum van ses wettige vuurwapens beperk word, sowel as die kriminalisering van die vuurwapeneienaars wat ammunisie herlaai.

“Die huidige wetgewing is reeds omslagtig en ingewikkeld, wat lei tot ’n groot administratiewe las op die SAPD. Dit is baie duidelik dat die voorgestelde wysigingswetsontwerp voorsiening maak vir nog meer beheer en dat dit dan nog meer ingewikkeld, omslagtig en moeiliker gaan wees om te implementeer.”

Belangrike wysigings wat vir SA Jagters van belang is, sluit in:

  • die ontneming van die individu se reg om ’n vuurwapen vir selfverdediging te besit;
  • die beperking op die aantal vuurwapens en ammunisie wat toegewyde jagters en sportskuts ingevolge artikel 16 mag besit;
  • die uitbou en herdefiniëring van die neem van ballistiese steekproewe, wat onuitvoerbaar en onprakties is;
  • die verandering van bevoegdheidsvereistes vir vuurwapeneienaarskap; en
  • die verbod op die herlaai van ammunisie deur vuurwapeneienaars vir eie gebruik en die verwydering van die voorsiening vir private versamelaars.

SA Jagters sê dat hulle met ʼn regspan gekonsulteer het oor die nodige regstappe teen hierdie voorgestelde wetgewing, indien ʼn regsgeding nodig sou wees. “Ons hou die situasie fyn dop en sal – soos in 2009 – voortgaan om ons lede se regte as wettige vuurwapeneienaars te beskerm,” sê Camphor.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

18 Kommentare

jongste oudste gewildste
Persheks Adri

Hierdie stupid wet mag NIE deur gevoer word NIE punt! Ons weet mos SAPS is onbevoeg om ons te beskerm. Cele kan dit vergeet punt

Tanniepetoors

Gee hulle al hul hel. Dis onsinnig om wetsgehoorsame mense te ontwapen. Kry die onwettige wapens van die straat af!

Eugene

Die wet ontneem ons die reg om onsself te verdedig, hoe kan enige regering so iets doen,. Ramaphosa behoort ‘n stop te sit hieraan. Ek wag nou al 175 dae vir my lisensie. My nuwe wapen is al 2 jaar in die handelaar se kluis

Werner

Sal nie my wapens gee nie.Natal en plaasaanvalle al die moorde is genoeg bewys dat die verskoning van n regering ons veiligheid nie kan waarborg nie.Was dit nie vir die gewapende burgers nie het ou Cele en Cyril al die wereld plat gehardloop .

Grant

Gaan se julle se op DearSA.gov. Dis al waar on steun kan gee.