SA kap na Trump oor Jerusalem-besluit

Vlag van Israel (Foto: PublicDomainPictures, Pixabay)

Verskeie Suid-Afrikaanse organisasies het hulle uitgespreek teen die Amerikaanse president Donald Trump se besluit om Jerusalem formeel te erken as Israel se hoofstad.

Dit volg nadat Trump aangekondig het dat die Amerikaanse ambassade van Tel Aviv na Jerusalem geskuif sal word. Dié besluit het wêreldwyd kritiek ontlok en verskeie organisasies en individue in Suid-Afrika het hulle hierby aangesluit.

Intussen het die ANC gesê ʼn afgradering, of moontlike sluiting van die Suid-Afrikaanse ambassade in Israel, wat in Julie voorgestel is, sal in Desember by die party se 54ste nasionale verkiesingskonferensie bespreek word as deel van die ANC se toekomstige internasionale beleid.

Cosatu het Donderdag in ʼn verklaring Trump se besluit veroordeel en dit as “roekeloos en uitdagend” bestempel. “Hierdie verregaande besluit bewys die vlak van agteruitgang van die Trump-administrasie en die Amerikaanse politieke stelsel in geheel,” lui die verklaring.

“Donald Trump se besluit is ook ʼn oortreding van internasionale wet en moet teengestaan word deur alle vredeliewende mense.” Volgens Cosatu is Trump se besluit die spyker in die doodskis vir enige vooruitsigte van ʼn vreedsame skikking van die Israelies-Palestynse situasie en sal dit godsdienstige spanning verder laat opvlam “omdat Jerusalem ʼn heilige plek vir Judaïsme, Christendom en Islam is”.

Die EFF het ook Donderdag sy stuiwer in die armbeurs gegooi en Trump se besluit veroordeel. “Ons sluit ons aan by die internasionale gemeenskap om ons walging uit te spreek teenoor hierdie besluit wat dien as gronde vir die algehele vernietiging van Palestina en sy mense,” het die party in ʼn verklaring gesê.

“Trump het in wese ʼn stempel van goedkeuring afgedruk op die projek van onwettige gedwonge verwyderings wat in Oos-Jerusalem deur Israel uitgevoer is. Sy besluit is ook in teenstelling met die internasionale reg en baie VN-resolusies rakende ʼn tweestaat-oplossing.”

Die EFF het ʼn beroep op die internasionale gemeenskap, veral die Europese Unie, gedoen om Trump se besluit te weier en Israel te dwing “om sy onwettige besetting van Palestina deur boikotte, beleggingsonttrekking en sanksies te beëindig”.

Die United Ulama Council of South Africa het in reaksie op Trump se besluit gesê die aankondiging is geen verrassing nie. “Die VSA was nooit ʼn eerlike makelaar van vrede in die Palestynse konflik nie. Indien enigsins, is dit Amerika se bevooroordeelde beleid teenoor besette Palestina wat tot die verlenging van die konflik bygedra het, ondanks verskeie VN-resolusies wat Israeliese aggressie ontken.”

Mandla Mandela van Mvezo, voormalige president Nelson Mandela se kleinseun, het hom ook teen Trump se besluit uitgespreek en gesê Jerusalem “sal altyd die hoofstad van Palestina bly”.

“Trump se onwettige besluit om Jerusalem tot die hoofstad van Israel te verklaar, is ʼn daad van aggressie teenoor die Palestyne en alle vredeliewende mense in die wêreld.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

36 Kommentare

jongste oudste gewildste
Matmiet

So as of hier politieke voor uitgang is.

JZ

Ek dink die ANC ,EEF, Cosato moet eers hier voor hul eie deur vee voor hulle ander veroordeel.

Matt 7:5

Huigelaar! Haal eers die balk uit jou eie oog uit, dan sal jy goed kan sien om die splinter uit jou broer se oog te haal.

Andréas

Alle feite moet eers goed ondersoek en bekend gemaak word voordat oorhaastig geoordeel word. Kommerwekkend is dat die SA regering en sommige partye niks rep (of ooit standpunt inneem) oor erge vergrype en diktatorskappe (of is dit diktatuur?) in Afrika nie maar hans voorpraters is wanneer die Rand se waarde slegs meer negatief hierdeur geraak kan word.

Netso

Het eintlik nog altyd aan Israel behoort