SA paai oor vertraging van Malawiese vlug

Pres. Cyril Ramaphosa tydens sy ontmoeting met Malawiese pres. Lazarus Chakwera. (Foto: Jairus Mmutle/GCIS)

Die Suid-Afrikaanse regering sê die vertraging van Malawiese pres. Lazarus Chakwera se vlug – wat woedende reaksie van die Malawiese regering uitgelok het – was weens belangrike prosedures wat gevolg moes word.

ʼn Woordvoerder vir die departement van internasionale betrekkinge en samewerking, Clayson Monyela, het gesê tydens die vertraging – glo langer as ses uur – het Suid-Afrikaanse amptenare nie die gewone diplomatieke hoflikheid wat aan besoekende presidensiële afvaardigings betoon word, onnodig in die gedrang gebring nie.

“Die kwessie van die vertraging van die Malawiese presidensiële straler by die Waterklooflugmagbasis was ongelukkig en onvermydelik. Die vertraging is veroorsaak deur belangrike sekuriteit-, logistieke en prosedurele prosesse,” het Monyela gesê.

Hy het gesê dié prosesse het kommer en misverstande by die Malawiese afvaardiging veroorsaak.

“Die bekommernisse is hanteer,” het Monyela gesê.

“Kwessies wat verband hou met die gebeure by die Waterklooflugmagbasis sal deur diplomatieke kanale hanteer en bespreek word.”

Die Suid-Afrikaanse regering het ook benadruk dat hy verbind bly tot samewerking met die Malawiese regering om gemeenskaplik voordelige betrekkinge te verseker.

Chakwera se werksbesoek aan Pretoria is gehul in omstredenheid nadat die owerhede hier ontdek het dat die selfverklaarde profeet Shepherd Bushiri sy borgtogvoorwaardes verbreek en landuit gevlug het. Hy bevind hom tans terug in Malawi.

Dié land se regering het vandeesweek in ʼn verklaring sy misnoeë met Chakwera en sy afvaardiging se behandeling ná die ontmoeting met pres. Cyril Ramaphosa te kenne gegee. Amptenare van die Malawiese departement van buitelandse sake het gesê hoewel die presidensie ʼn openbare verklaring uitgereik het dat Chakwera geen rol gespeel het in Bushiri se ontsnapping nie, het die verklaring steeds tekort geskiet.

“Die Malawiese regering is bewus van en dankbaar oor die openbare verklaring wat pres. Chakwera van blaam onthef na aanleiding van die vals bewering in die Suid-Afrikaanse media dat sy presidensiële vliegtuig gebruik is as voertuig om twee gesoekte Malawiërs [landuit] te smokkel,” het die Malawiese regering gesê.

“Ten spyte hiervan neem Malawi met kommer kennis dat die verklaring nie sê dat die behandeling waaraan pres. Chakwera tydens sy vertrek onderwerp is onbehoorlik en ongerymd was en in skerp teenstelling was met die hartlikheid waarmee hy met sy aankoms ontvang is nie.”

Suid-Afrika het reeds ʼn lasbrief vir die inhegtenisneming van Bushiri en sy vrou, Mary, uitgereik.

Die Valke is ook oënskynlik gereed om op die egpaar se R5,5 miljoen-huis in Centurion beslag te lê.