‘SA politieke risiko vandag erger as onder Zuma’

piet-le-roux-afrisake-2018-06-05

Piet le Roux, die uitvoerende hoof van Sakeliga. Foto: Reint Dykema.

Politieke risiko in Suid-Afrika is vandag erger as onder oudpresident Jacob Zuma drie jaar tevore.

Diversifisering internasionaal om teen plaaslike politieke risiko te verskans word die norm. Dit, te oordeel na ʼn peiling onder Sakeliga-lede en intekenare in Augustus.

Sakeliga se peiling onder lede en intekenare kom in aanloop tot dié organisasie se eersdaagse toer na verskeie sakebestemmings in Europa. Hoogtepunte uit die peiling sluit in: 84% van respondente beskou politieke risiko in Suid-Afrika as erger as drie jaar gelede; 25% van respondente het al bepaalde internasionalisering van hul bedryfsaktiwiteite afgehandel of reeds begin.

“ʼn Verdere 24% van respondente beoog om hul bedryfsaktiwiteite binne die volgende drie jaar internasionaal te diversifiseer. Altesaam 21% van respondente het die registrasie van hul ondernemings in buitelandse jurisdiksies al afgehandel of reeds begin. ʼn Verdere 25% beplan om dit binne die volgende drie jaar te doen,” het Piet le Roux, uitvoerende hoof van Sakeliga, gesê.

Volgens Le Roux word die internasionalisering van Suid-Afrikaanse ondernemings, gegewe omstandighede, verwelkom.

“Verskansing teen politieke risiko in Suid-Afrika is sinvol. ‘Staatsbestande’ ondernemings is beter toegerus om plaaslike bedryfsaktiwiteite in riskante omstandighede voort te sit en die ekonomie teen politieke storms te beskerm. Daarsonder sou die Suid-Afrikaanse ekonomie eersdaags in ʼn veel slegter toestand wees.

“Dit is waar dat sommige ondernemings en uitvoerende personeel Suid-Afrika geheel en al verlaat. Ons vind in terugvoering van lede en tendense egter nie aanduidings van ʼn volslae uittog nie. Ons indruk is dat ondernemings eerder tans daarop fokus om ʼn gesonde verskansingstrategie teen politieke risiko in plek te stel.”

Le Roux sê dat, nieteenstaande baie hoop, planne en retoriek, die Cyril Ramaphosa-presidensie nie presteer nie.

“Die telbord sê president Ramaphosa se termyn word gekenmerk deur toenemende maatskaplike onstabiliteit, onluste en ontwrigting, verslegtende saketoestande, verswakkende eiendomsreg, verskerping van rasdiskriminerende beleide soos Swart Ekonomiese Bemagtiging, voortgesette fiskale verkwisting, en ʼn verskeidenheid van ander skadelike intervensies. Dit is daarom nie verbasend nie dat sakelui besluit om hul blootstelling aan politieke risiko te verminder, eerder as om te wag op onbetaalde beloftes van beter saketoestande.

“Om ʼn ekonomie se enjins van groei uit die hande van politici te hou, is nie net goeie besigheid nie, maar –die belangrikste – ʼn openbare weldaad,” sê Le Roux.

“As sodanig verwelkom ons die toenemende internasionalisering van ondernemings in Suid-Afrika as iets wat plaaslike ekonomiese toestande verbeter, gegewe die stand van politieke risiko. Ongetwyfeld sal die tendens omkeer sou president Ramaphosa sy belofte van ʼn nuwe daeraad nakom en verskansing minder nodig is. Tot dan sal ondernemings in Suid-Afrika die verantwoordelike ding doen en hulself, hul werknemers en verbruikers teen politieke risiko beskerm.”

Sakeliga se internasionale toer

Van 13 tot 20 September besoek Sakeliga ondernemings, ontleders en organisasies in verskeie Europese stede. Die doel van die toer is om Sakeliga internasionaal bekend te stel, gunstige internasionaliseringsgeleenthede vir sakelui wat uit Suid-Afrika besigheid doen te identifiseer, en om netwerke met die groeiende aantal eks-Suid-Afrikaners in die buiteland in stand te hou. Stede wat besoek word sluit onder meer in Londen, Antwerpen en Den Haag.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

35 Kommentare

Pieter ·

Daar is genoeg Pinotage onder Cyril se vetrouelinge en borge op Stellenbosch. Laat die volk brood vreet, terwyl hul koek en Pinotage het. Die volk sal hul passiewe-fatalistiese houding moet afskud.

Posduif ·

Dalk is die Suid Afrikaners wat reeds in die buiteland gevestig is goeie kandidate om betrokke te raak by SA maatskappye wat internasionaliseer!! Om Suid Afrikaners in jou maatskappy in die buiteland te he, kan seker baie voordele inhou. Dink net hoe lekker kan jy Afrikaans hoor daar uit jou hoofkantoor in Londen, Antwerpen en Den Haag.

Koos de Meyer. ·

Die klomp het nog nie by Zimbabwe en die res van Afrika geleer nie.

John ·

Ons trek by ‘n kategorie-? storm wat ons ekonmie betref en dit tel spoed op… die tol is glo saam met die klok in die Suidelike Halfrond. Mense byt meestal maar langtand aan eie goed ver in die vreemde vir na-aan-jou-skade. Dalk is Namibiè ‘n nie te slegte plek vir beleggings nie. Bly, bly mens lekker daar… Water is net skaars. Verseker sal drs soheen skuif, selfs mediese sentrums oprig waarheen S-Afrikaners sal stroom wanneer ons droom-mediese skema in ongevalle beland. Siekes in die VSA oorval weer Kanadese klinieke en apteke.

Kallie ·

En dit gaan erger word. Ons is op pad na volslae sosialisme. Die risikos sal hardhandig hanteer word.

Ruiklont ·

Die paar daarbo in die uitvoerende gesag sal nog meer ryk word en die middelklas sal verdwyn Die meerderheid wil dit so hê ( bewys die afgelope stemming), die res wil krepeer soos die res van Afriaka reeds bewys het

Jimmy ·

Nou kan Sakeliga se moedermaatskappy begin om gewone burgers ook te help hervestig êrens in die buitewêreld. Die realiteite begin nou helder word.

Trojaanse Donkie ·

Nou praat jy! Daar kan gerus instansies wees wat die mense te help padgee terwyl daar nog tyd is!

Johann M van Heerden ·

Wat van ons wat nie kan skuif of diversifiseer nie?

Netta ·

Diesulkes van ons kom op ons knieë en bid tot God, Hy sal ons dra en het sal red omdat ons sy kinders is. Hy is en bly in beheer.
Ek glo vas Zuma is agter onrus. Dink mooi daaroor.

Ronel ·

Ons land was reeds aan die brand toe CR oorneem. Eintlik kan ons nie wonderwerke van hom verwag nie. Ek vermoed ook daar is faksies wat op die agtergrond die land onstabiel probeer hou.

Trojaanse Donkie ·

Dink jy rerig hy gee regtig om? Hy beweer dat selfs Mugabe ‘n held in Afrika was.

Boy van die Suburbs ·

10 jaar gelede toe ek die mense gewaarsku het, dat ons op die Zim pad is, het mense my aangekyk of ek my varkies verloor het!! Nooit!! Het almal gegil – Die Ruperts en Stellenbosch se Boys (Mafia) sal dit NOOIT toelaat nie!! Vandag wil Johann Rupert die land verlaat. Moet nooit sê nooit nie! SA is blitsvinnig oppad na ‘n Sosialistiese suksesverhaal….

Eish ·

Ja, die rotte weet altyd eerste dat die skip besig is om te sink.
600 000 Afrikaansprekende blanke verarmdes. Wat van ons?

Vaalseun ·

So, waar is dit veiliger as Suid-Afrika om heen te emigreer?
Nieu-Zeeland en Australië het die hoogste per capita gebruik van dwelms in die wêreld. Elke 2.5 sekondes word iemand in Amerika gearresteer.
Suid-Afrika is vandag nog steeds baie veiliger as in die tyd van Piet Retief of Genl. de la Rey. Hulle en hulle nageslagte het van Suid-Afrika ‘n veiliger land gemaak. Hulle voorsate het hierheen gekom vanweë die oorloë en godsdiens vervolging in Europa.
Niemand anders as onsself gaan Suid-Afrika veiliger en voorspoediger maak vir ons as onsself nie. Net soos ons voorsate die uitdaging aanvaar het en geslaag het, moet ons die uitdaging aanvaar en aanpak.
Hierdie land is nog steeds die mees fantastiese land in die wêreld.

Kallie ·

Vaalseun, jy moet gerus begin reis en die wêreld daarbuite ontdek. Verskaf ook die bronne van jou beweringe. Onthou, hoopynpille en maagmedisyne is ook dwelms. Mens raak ook verslaaf aan twak praat. Maar dis goed om positief te bly.

Die twee tand skaap ·

Whats new ?
Dis presies wat voorspel is in 1994.

Kerneels ·

Solidariteit begin seker ook nou besef die begin van die einde het aangebreek.

Chris ·

Vaalseun jy leef lekker in jou eie feëtjiewereld. Ons is nou al 20 jaar in Australië. Ons as familie floreer in hierdie pragtige land met sy wonderlike hardwerkende wetsgehoorsame mense. Nie vir een enkele oomblik spyt ons het hierheen gekom nie.

Vaalseun ·

Soos jy sê, Chris, ‘n feëtjiewêreld, maar dalk vir ons albei.
Die vermoorde Aiia Maasarwe se suster het trouens gesê, “She was living a dream in Melbourne, a dream that ended up worse than a nightmare.”

Johan ·

Solank besigheidseienaars nie self besluit om BEE en soortgelyke nonsens te ignoreer nie, en die staat in hulle peetjie in te stuur nie, sal totale verwoesting van die ekonomie nie afgeweer kan word nie. Dit is nou die peilvlak. Maak of breek. Die mag lê nie in die regering se hande nie, maar in die besighede wat kies om die regering te volg!

Jerry ·

Soms wanneer die realiteite van die politieke risiko inskop, soos onder andere dat die mat onder privaatmaatskappye uitgeruk kan word deur wetgewing, gesteun deur die grondwet, dan skop verstandigheid ook in. Slegs n handjievol kommentators, meningvormers en ekonome uitgesluit, het hierdie gedwonge strategiese aanpassing sien kom! Baie meer aanpassings gaan vorentoe gemaak moet word om die politieke risiko klimaat wat deur die ANC staat geskep word, te omseil! Hierdie is net die begin om ook besighede buiteland toe te skuif. Die uiteinde sal wees dat die Afrikaner vanuit die buiteland onder dekking as buitelandse maatskappye, besigheid in SA sal doen!

Danien ·

ja is soos jy se en die Afrikaner wat dieselfde besigheid wat nou geskuif het na die buiteland help opbou het ,word agter gelaat om te vrek want daai maatskappy het klaar van sy dienste gebruik gemaak.

Piet parys ·

Waar your people oorgevat cyril is die lande in n anargie van misdadigheid gewikkel en so sal dit wees met zar ook . Jy kan nie onopgevoede mense n staat laat regeer nie . Die onopgevoedes is mos geleer deur die anc dat as jy brand afbreek verkrag dan kry jy n ticket n anc lidmaatskap. As julle dit anders benader soos blanke denkwyse toegepas het dan sou dit anders wees.

Vaalseun ·

Kallie, toe ek in Duitsland gewerk het, het ek ‘n artikel in ‘n Duitse tydskrif gelees oor hoeveel Duitsers die vorige jaar in lande buite Duitsland vermoor is. En die land waar die meeste Duitsers buite Duitsland vermoor is, was … Frankryk!
Maar die land waar die meeste Duitsers vermoor word elke jaar, is nog steeds Duitsland self.
En net so, in Suid-Afrika word die meeste Suid-Afrikaners vermoor. Trek weg, en word liewer ‘n Australiër. Maar onthou, Australië is die land waar die meeste Australiërs vermoor word.

Petrus ·

Ek twyfel baie sterk of SA emigrante in Australië en New Zeeland en Kanada en ander gewilde bestemmings met jou sal saamstem. Wees veilig en waaksaam, en hoop vir die beste.

Jimmy ·

Vaalseun, jy verdraai statistiek gruwelik om jou narratief te pas.

Andrea van Vuren ·

Henry jy praat waar. Eienaardig dat daar GEEN pogings aangewend word om Ace vas te trek nie. Wonder oor sy houvas op die land.

KrokodilBotha ·

My std. 5 afrikaanse onnie het ons klas vertel , ons bly in die land van melk en heuning. Dis n ruk terug, en dit was so. Nou is die melk afgewater , en die heuning is half stroop en kom van Sjina. Ekonomie is so sleg tot die DA sal nie bonuse kry nie. Hulle geldelikke ondersteuners ontrek. So die tax ensv. sal nou opgaan as jy in Wes Kaap bly. Vir bonuse, natuurlik. Dis net klagtes. maar ons sal weer opstaan en van voor begin. Hier of in die vreemde. Maar die ekonomie is poer in sy kanon. Vinger wys is daar baie skuldiges, ook die wat met hul stemme dit ondersteun het. BEE , regstellende aksies, diefstal , ensv. Sterkte aan die wat in die vreemde n nuwe besigheid kan begin. Ons kan voor uit boer.

Brakenjan ·

Mnr Ramaphosa laat ANC skeur . Hoop jy het 55%+ steun. Dan kan daar dalk iets gebeur
Jy sal die SA redder wees daarna.

San ·

Dit gaan jare neem om Zuma se gemors wat hy agtergelaat reg te kry. Tweedens word daar heeltyd reddingsboeie vir SAL, SABC ens. gegee. Boer agteruit.

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.