SA-regering antwoord VN vandag oor regstellende aksie

'n Afvaardiging van Solidariteit by die Verenigde Nasies in Genève. Foto: Solidariteit

‘n Afvaardiging van Solidariteit by die Verenigde Nasies in Genève. Foto: Solidariteit

Die Verenigde Nasies (VN) se komitee vir die uitwissing van alle vorme van rassediskriminasie het Dinsdag ná ʼn aanbieding van die Suid-Afrikaanse regering in Genève gevra wanneer die regering beplan om die beleid van regstellende aksie in Suid-Afrika af te skaf en gewaarsku dat dit nie vir ewig kan voortgaan nie.

John Jeffrey, Suid-Afrika se adjunkminister van justisie en grondwetlike ontwikkeling, het Dinsdag namens die Suid-Afrikaanse regering ʼn verslag oor rassekwotas en regstellende aksie aan die komitee voorgelê.

Dit is in antwoord op ʼn aanbieding wat Maandag deur Solidariteit en AfriForum aan die komitee gedoen is, waarin daar klem gelê is op die staat se wiskundige benadering tot regstellende aksie wat tot rassesilo’s lei en teen die konvensie van die VN indruis. Solidariteit en AfriForum het ook ʼn aanvullende verslag oor diskriminasie in sport aangebied.

In die regering se aanbieding Dinsdag het Jeffrey gefokus op die suksesse van die regering om armoede uit te wis en ook klem gelê op nuwe wetgewing teen haatspraak. Ten opsigte van regstellende aksie het Jeffrey gefokus op die oorverteenwoordiging van wittes op topposvlakke.

Dr. Dirk Hermann, bestuurshoof van Solidariteit, het gesê daar is Dinsdag ná afloop van die regering se aanbieding indringende vrae gevra oor die manier waarop regstellende aksie toegepas word.

“ʼn Komiteelid, Baron Marc Bossuyt, voormalige voorsitter van die grondwetlike hof in België, het in reaksie op die regering se aanbieding gesê dit blyk dat daar in die politieke omgewing gefokus word op kwantitatiewe eerder as kwalitatiewe uitkomste wanneer dit by die toepassing van regstellende aksie kom,” het Hermann gesê.

“Bossuyt het gesê in Suid-Afrika word regstellende aksie te rigied toegepas deur die nasionale demografie te gebruik. In sekere staatsomgewings kan dit nog geregverdig word, maar in die ekonomiese omgewing, private omgewing en sport is rigiede maatreëls absurd.  As jy mense wil help, moet mense gehelp word op grond van nood en armoede en nie op grond van velkleur nie.”

Daar is ook tydens die bespreking genoem dat die konvensie rassisme wil uitwis en dat die idee van verteenwoordigendheid teen die konvensie indruis, aangesien dit kan lei tot ʼn stelsel soortgelyk aan die ou apartheidstelsel. Die manier waarop regstellende aksie toegepas word, is belangrik, en nie net die doel nie, omdat geen vorm van diskriminasie aanvaarbaar is nie, het die komitee gesê.

“Ons is baie tevrede met ons besoek en die reaksie wat ons ontvang het,” het Hermann gesê. “Ons aanbieding [Maandag] en ʼn private ontmoeting wat ons [Dinsdag] met die komiteelede gehad het, het goeie weerklank in die vrae van die komiteelede gevind. Ons boodskap is as vars beskou en het nuwe perspektief vir die komitee gebring.”

Die Suid-Afrikaanse regering sal vandag om 10:00 vrae oor sy aanbieding beantwoord.

Die VN-komitee sal ná die sitting aanbevelings doen wat deur lidlande geïmplementeer moet word. Suid-Afrika het die konvensie vir die uitwissing van alle vorme van rassediskriminasie bekragtig en is daarom verplig om die aanbevelings te implementeer en verslag aan die komitee te doen.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

47 Kommentare

jongste oudste gewildste
Koos

Ek is positief dat geregtigheid hier gaan seëvier en dit sal geregtigheid bring vir die huidige benadeelde minderheid.

Wouter

Vat so ANC. Dankie Solidariteit en Dr Hermann vir wat julle vir ons nou benadeelde nasie doen.

Gironki

Dr. Dirk Hermann, Solidariteit en AfriForum moet geloof word vir die wyse waarop hulle ons land se belange op die hart dra en veg vir ons regte. Baie trots op julle!

Anti-Haas

Hierdie is baie goeie nuus.
My vraag is net: 1. Gaan die ANC die uitslag toepas. In die verlede het hulle letterlik hul gat afgevee aan die uitslag van hof beslissings…….2. Kan hulle na ons Grondwetlike Hof gaan en weer “appeal”?????

Pammy

Amen ! Uiteindelik is daar weer n vlammtjie van hoop danksy Solidariteit, Afriforum en Dr Dirk Hermann. Op die manier kan ons weer ons eens mooi land weer optel uit die stof en maar weer opbou.