SA regering se planne ná Trump-twiet

Nomvula Mokonyane. Foto: Elmond jiyane, GCIS

Die Suid-Afrikaanse regering het die burgerregtegroep AfriForum by implikasie van onpatriotiese gedrag en leuenagtigheid beskuldig ná pres. Donald Trump van die VSA se twiets oor grondonteiening vanoggend.

Trump het vanoggend getwiet: “Ek het die minister van buitelandse sake (Mike Pompeo) gevra om ondersoek in te stel na die Suid-Afrikaanse afneem van grond en plase en die grootskaalse moord op boere. Die Suid-Afrikaanse regering neem tans grond van wit boere af,” het Trump getwiet.

Die laaste sin van Trump is ʼn aanhaling uit ʼn program van die TV-kanaal Fox News waarna Trump gekyk het en waarin die aanbieder, Tucker Carlson, beweer het dat pres. Cyril Ramaphosa pas begin het om grond van Suid-Afrikaners af te neem suiwer gegrond op hul velkleur. Volgens Carlson is die beweerde gebeure veel meer rassisties as enigiets wat Trump al ooit gedoen het, maar die Amerikaanse elite gee nie om nie.

Die bewerings deur Trump en Carlson kom ʼn dag nadat Ramaphosa hom spesifiek van grondbesettings en die EFF-beleid van die nasionalisering van grond gedistansieer het.

Ernst Roets, adjunk- uitvoerende hoof van AfriForum, het Trump se twiet verwelkom as synde ʼn bewys dat AfriForum se veldtogte in die VSA suksesvol is.

Die gebeure het vanoggend se mediakonferensie oor die weeklikse kabinetsvergadering oorheers, met die parlementêre perskorps wat die minister van kommunikasie en kabinetswoordvoerder, Nomvula Mokonyane, daaroor gepeper het. Mokonyane het Trump se twiet as “ongelukkig” bestempel en gesê geen selfrespekterende land of individu sal aanvoer dat patrone van grondbesit in Suid-Afrika dieselfde moet bly nie.

“Ten einde die ekonomie te laat groei, moet verskeie uitdagings oorkom word, wat insluit dat die pas van grondhervorming moet versnel. Die landbousektor moet groei en meer inklusief gemaak word, ook wat eienaarskap en vestigingspatrone betref,” het Mokonyane aangevoer.

Sy het aangevoer dat regse groepe wêreldwyd en op die internet tans veldtogte teen Suid-Afrikaanse regeringsbeleid voer. Die organisasie Brand SA (Handelsmerk SA) werk tans veral in Australië en Brittanje om die indruk wat gewek word, hok te slaan, het Mokonyane gesê.

Suid-Afrikaanse ambassades en ander lande se ambassadeurs word ook voortdurend deur die regering oor Suid-Afrikaanse beleidsdoelwitte ingelig, want die regering is bekommerd oor ʼn verkeerde indruk wat deur regse groepe uitgedra word, het Mokonyane gesê.

Op ʼn vraag spesifiek oor AfriForum het Mokonyane, sonder om AfriForum by die naam te noem, gesê sommige mense gee voor om patriotte te wees, maar moet eerder, soos AgriSA, leer om regstreeks met die regering te onderhandel. “Ons land moet ons eie probleme oplos en mense moet regstreeks met die regering skakel eerder as om hulle tot ander partye te wend,” het Mokonyane voortgegaan.

Sy het gesê Handelsmerk SA werk tans teen wat sy as ʼn aanslag bestempel. Sy meen ook die Suid-Afrikaanse departement van buitelandse sake is in staat om die situasie te hanteer. Sy meen die aanslag kom wêreldwyd van regse politieke organisasies wat nie altyd aan feite gebonde is nie.

Mokonyane het gesê dis jammer dat Trump nie die feite met die Suid-Afrikaanse regering nagegaan het langs die korrekte kanale nie, en dat sy twiet kommerwekkend is.

Tot dusver is daar volgens die minister geen regstreekse politieke gevolge nie.

Sy het gesê die regering wag vir die afloop van die parlementêre proses, en het kennis geneem daarvan dat sowat 60% van die skriftelike voorleggings aan die parlement tot dusver teen die herroeping van die Grondwet se eiendomsklousule (art. 25) was, maar het uitgewys dat die wind tydens die openbare verhore anders gewaai het.

Sy het die versekering gegee dat die regering sy opsies versigtig sal oorweeg en nie oorhaastig ʼn besluit sal neem nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

59 Kommentare

jongste oudste gewildste
Avra

En jy wil hê ons moet jou glo en vertrou?

Swapie

Bring die kommando sisteem terug en ons sal dalk beter gesind raak teenoor die ANC regering

marous

Waar is Tzaneen dam en Clanwilliam dam se geld heen medame? Jou opvolger beweer hy het ‘n bankrot afdeling geerf .

willie

Die satan is dìe vader van die leuen daarom kan jy nie sy kinders glo nie! Nood berig, Prez Trump het bedank na al die dreigemente uit die magtige SA!

X SA'ner

Alles wat gesê is is feite, hoekom maak ons regering en parlement asof dit onwaarhede is?Hulle weet baie goed dis ware feite en hou hulfself dom astrant, om te sê ons kan alles self hier uitsort is ook nonsens, as dit so was sou AfriForum nie nodig gehad het om VSA toe te gaan, sy en die hele spul kort ‘n paar warm klappe…