SA-regering stamp weer kop met Australië

Lindiwe Sisulu (Foto: Departement van kommunikasie)

Suid-Afrika se departement van internasionale betrekkinge en samewerking (Dirco) het teen die Australiese regering uitgevaar omdat dié ʼn reiskennisgewing wat “misleidende inligting oor Suid-Afrika” bevat, nie wil wysig nie.

Australië het in sy jongste opdatering oor Suid-Afrika se status onder meer reisigers gewaarsku om ʼn “hoë mate van versigtigheid te handhaaf” weens die hoë gevalle van ernstige misdaad in dié Afrika-land. Dié opdatering is reeds in Januarie gemaak.

“Daar is ʼn bedreiging van terrorisme in Suid-Afrika. Aanvalle kan lukraak plaasvind, insluitend by plekke wat deur buitelanders besoek word, soos winkelsentrums,” lui die kennisgewing.

“Die voorkoms van die meeste soorte misdaad neem toe. Rooftogte word gereeld aangemeld op die paaie en by winkelsentrums. Besoekers aan winkelsentrums moet ten alle tye paraat wees, asook wanneer openbare vervoer gebruik word.”

Die kennisgewing raai besoekers aan om groot byeenkomste of demonstrasies te vermy, aangesien dit “vinnig gewelddadig kan raak”.

Ndivhuwo Mabaya, Dirco se woordvoerder, het Donderdag in ʼn verklaring gesê die departement neem “sterk aanstoot” deur die kennisgewing.

“Minister Lindiwe Sisulu sal die Suid-Afrikaanse regering se bekommernisse met haar Australiese eweknie, minister Julie Bishop, opneem,” het Mabaya gesê.

“Die reiskennisgewing het die potensiaal om nie net Australiërs te ontmoedig om Suid-Afrika te besoek nie, maar ook om die land se beeld ernstige skade aan te doen.”

Mabaya het gesê beamptes van Dirco het in die verlede, sonder sukses, versoek dat die kennisgewing gewysig word om die ware situasie in Suid-Afrika te weerspieël oor hoe toeriste dit werklik ervaar.

“Die besluit om die kwessie te eskaleer spruit uit onsuksesvolle pogings [om die kennisgewing te wysig] en dui aan hoe ernstig die Suid-Afrikaanse regering die toerismebedryf se ekonomiese waarde beskou,” het Mabaya bygevoeg.

“Suid-Afrika bly een van die gewildste toeristebestemmings ter wêreld en toeriste het, in die meeste gevalle, aangename ervarings van ons land,” het Sisulu vroeër gesê.

Sisulu stamp sedert Maart vanjaar koppe met sommige Australiese politici nadat Peter Dutton, dié land se minister van binnelandse sake, gesê het sy departement is besig om ondersoek in te stel na ʼn reeks maniere om wit Suid-Afrikaanse boere te help om vinnig na Australië te kan emigreer.

Dutton het gesê wit Suid-Afrikaanse boere verdien “spesiale aandag” weens die “gruwelike omstandighede” waarin hulle hul bevind. Dutton het in ʼn onderhoud met The Daily Telegraph gesê Australië het ʼn vlugteling- en humanitêre program, asook ʼn aantal ander visumprogramme om diegene wat “vervolg” word te probeer help.

Dirco het Dutton se uitsprake skerp gekritiseer en Sisulu het ʼn diplomatieke démarche aan Adam McCarthy, die Australiese hoë kommissaris in Suid-Afrika, gerig om aan te dring dat Dutton se uitsprake oor grondonteiening teruggetrek word.

Dirco het vroeg in April in ʼn verklaring gesê minister Sisulu “verwelkom Malcolm Turnbull, die Australiese eerste minister, en Bishop se terugtrekking van [Dutton] se uitsprake oor die Suid-Afrikaanse grondhervormingsproses”, hoewel Dutton kort daarna in ʼn onderhoud ontken het dat sy uitsprake teruggetrek is, soos Sisulu beweer het.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

56 Kommentare

jongste oudste gewildste
Eish

Daar is niks fout met die waarskuwing nie. Die meerderheidsregering se ampdraers ervaar dit normaalweg nie vanweë die blouligbrigades.
Feite word bekom uit betroubare bronne.
Bus met toeriste word gekaap. Vra die Nederlanders. Die koppestamp sal voortduur aangesien standaarde tussen die twee lande soos dag en nag verskil.

willie

Doen so voort Australia die waarheid maak seer! Dankie!

ferdi

Va watter beeld word hi gepraat di land is toonbeeldvan misdaad in di ergste vorm

Domvraag

Sisulu ly aan ontkenningssindroom maar hoekom het sy n hele armade van lyfwagte?
Dankie dat Australië se oë oopgaan. Dis net jammer dat die res van die wêreld nog oogklappe aan het.

Amelia

Mooi man, tyd dat al die buitelande dit doen. Want die waarheid is die waarheid. Hoeveel toeriste is sommer net vermoor? En dan is dit onskuldige mense wat nie eens enige iets aan die agtergeblewendes gedoen het nie. Dit is mos die norm vir moord. Gebore wit in Suid Afrika dan sal jy sterf. Hoe wreder, hoe beter. Ten minste een land wat sy eie mense se veiligheid op prys stel en nie net een kleur mense nie. Almal wat in Australie bly. Australiers kan trots wees op hul regering.