SA se Lalela eindig 3de in Israel

Lalela Mswane is as tweede prinses in die Mej. Heelal-kompetisie in Eilat, Israel, aangewys. (Foto: Verskaf/Miss South Africa Organisation)

Suid-Afrika se Lalela Mswane, wat onlangs as die nuwe Mej. Suid-Afrika aangewys is, het Maandagoggend derde geëindig in die 70ste jaarlikse Mej. Heelal-kompetisie in Eilat, Israel.

Mej. Indië, Harnaaz Sandhu, het met die kroon weggestap, terwyl Mej. Paraguay, Nadia Ferreira, as eerste prinses gekroon is.

Mswane (24), wat oorspronklik van KwaSokhulu in Richardsbaai afkomstig is, het teen deelnemers van 80 ander lande meegeding. Sy was regdeur die kompetisie een van die voorlopers en het Vrydag die beoordelaars beïndruk met haar nasionale kostuum – ʼn wit uitrusting deur The Costume Department met wit vere wat ʼn duif van vrede simboliseer.

Sy het in haar finale toespraak net voordat die wenner aangekondig is, gesê sy moedig jong vroue aan om “waagmoed bo gemak” te kies.

“Ek wil hê jong vroue moet weet dat hulle uit die staanspoor oor alles binne-in hulle beskik om te bereik wat hulle wil, maar die wêreld oortuig ons dat ons dit nie het nie.”

Sy het ná afloop van die kompetisie gesê sy is oorweldig dat sy onder die topdrie is. “Die hele ervaring het my wildste verwagtinge oortref. Geluk aan Harnaaz en Nadia en al die ander deelnemers wat hierdie reis so spesiaal gemaak het. Ek is diep dankbaar vir die ongelooflike mense wat my ondersteun en bemagtig het.”

Mswane is ʼn model en danser van beroep en het ʼn regsgraad aan die Universiteit van Pretoria behaal.

Die Mej. Heelal-kompetisie is is aangebied deur die komediant Steve Harvey en regstreeks in Suid-Afrika op 1Magic, DStv-kanaal 103, uitgesaai.

Maroela Media het vroeër berig daar was teenkanting van verskeie drukgroepe, politieke partye en selfs die Suid-Afrikaanse regering oor Mswane se deelname aan die jaarlikse Mej. Heelal-kompetisie in Israel. Die groepe was uiters uitgesproke daaroor dat Mswane haar behoort te onttrek aan ʼn kompetisie wat in “apartheid-Israel” plaasvind.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

43 Kommentare

jongste oudste gewildste
Rudi

Mooi gedoen.

Yolande

Baie geluk!!!

Pierre

en nou gaan al daai wat haar wou terug hou gryp om haar geluk te wens, politiek sal politiek bly die dientjie sal nou verander.

jzjz05

Wonder wat voel die drukgroepe en die wat teen haar deelname was.haal my hoed vir haar af vir dat sy nie toegegee het aan hul politieke eise nie. Geluk met jou derde plek uit 80 deelnemers :_ wonderlik

Shakespeare

Baie geluk Lalela en ek eer jou vir jou waagmoed en beginselvastheid om die onbevoegde kader regering ‘n punt te druk. Mag jy van krag tot krag gaan.