SA ‘uiters gewelddadig’ – Cele

Minister Bheki Cele. (Foto: GCIS)

Die werklike omvang van die moedswillige plundering, brandstigting, beskadiging van eiendom en lewensverlies gedurende Julie se onluste in KwaZulu-Natal en Gauteng, is nou duidelik in die jongste misdaadstatistieke te sien.

Die statistieke het ook net weer bevestig dat Suid-Afrika ’n uiters gewelddadige land is, het Bheki Cele, minister van polisie, Vrydag met die bekendmaking van die misdaadstatistieke vir die tweede kwartaal van die 2021-’22-boekjaar gesê.

Byna 10 000 mense is gedurende dié kwartaal in Suid-Afrika verkrag, terwyl 20,7% meer mense om die lewe gebring is as tydens die vorige kwartaal. Dít sluit in 15 mense wat op plase of kleinhoewes vermoor is.

Al meer lewens geneem

Altesame 6 163 mense is tussen Julie en die einde van September in Suid-Afrika vermoor. Cele het gesê die aantal moorde is betreurenswaardig aangesien dit 1 056 meer moorde as dieselfde tyd verlede jaar is.

Die SAPD sê dit is egter belangrik om “appels met appels te vergelyk” en wys daarop dat syfers verlede jaar aansienlik laer was weens die Covid-19-inperking.

Volgens Cele is die Zuma-onluste een van die faktore wat tot die toename in moorde bygedra het. KwaZulu-Natal, waar moeilikheidmakers veral bedrywig was, het gedurende die tweede kwartaal ’n skokkende toename van 44% in moorde aangemeld.

Altesame 1 744 mense is tussen Julie en September in dié provinsie vermoor, terwyl 229 meer moorde in dieselfde tyd in Gauteng gepleeg is.

“Hoewel dit duidelik is dat die onluste tot die stygende moordsyfers bygedra het, moet ons toegee dat ander provinsies soos die Vrystaat, Limpopo, Mpumalanga, die Noord-Kaap en Noordwes óók in hierdie tydperk dubbelsyferstygings in moorde aangeteken het,” het die minister uitgewys.

Die Wes-Kaap was die enigste provinsie om ’n afname in moorde tydens die tweede kwartaal aan te teken. Cele het egter nie oor die DA-beheerde-provinsie se moordsyfer uitgebrei nie.

Luidens die statistieke het 1 334 moorde gedurende die tweede kwartaal óf by die slagoffer se huis óf by die oortreder se huis plaasgevind.

Altesame 2 424 mense is gedurende die betrokke tydperk in openbare plekke soos ’n straat, oop stuk veld, parkeerterrein of verlate gebou vermoor, terwyl 424 mense by tavernes, sjebeens, nagklubs en drankwinkels om die lewe gebring is.

Plekke waar drank verkoop word, is tans die derde mees waarskynlike plek in Suid-Afrika om vermoor te word.

Dit terwyl die topvier-oorsake van moord in dié stadium aan argumente, boendoegeweld, rooftogte en bendegeweld toegeskryf kan word.

Thulare Sekhukhune, die polisie se hoof van misdaadnavorsing en ‑statistieke, het vanmiddag op sy beurt gesê dat 64 meer vroue en 69 meer kinders gedurende die betrokke tydperk vermoor is.

Brandstigting

Altesame 298 (30,2%) meer gevalle van brandstigting is gedurende die tydperk aangemeld, terwyl kwaadwillige saakbeskadiging met 6,5% toegeneem het. Cele het dié toename ook grootliks aan die onluste toegeskryf.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

43 Kommentare

jongste oudste gewildste
Martie Smartie

Cele se ideale oplossing om die misdaadsyfer af te bring: inperking for ever and ever. Net ANC ministers moet kan rondkerjakker in die duur karre wat hulle gekoop het met ons geld.

Pierre

so doen jou werk

Willem

Cele..jy met jou onderwysdiploma…beteken NIKS vir die SAP nie..JY is onbevoeg.PUNT.Kaderontplooïng op sy beste.

Tewie

Wow jy het wakker geword. Waar was jy al die tyd?

Tewie

Wow waar was jy al die tyd? Het jy nou eers wakker geword?