SA vergader met ambassadeurs oor aanvalle op buitelanders

Bheki Cele, die minister van polisie, tydens die vergadering met sakelui. (Foto: Simphiwe Mbokazi/ANA)

Die minister van internasionale betrekkinge, Naledi Pandor, het Maandag in Pretoria agter geslote deure met ambassadeurs en hoë kommissarisse van hoofsaaklik Afrika-lande vergader oor die onlangse vlaag aanvalle op veral Afrika-immigrante se sakeondernemings.

“Ons het dit nodig gedink om met alle ambassadeurs van lande wat in Suid-Afrika verteenwoordig is te vergader, sodat ons ʼn bespreking kan voer oor die onlange voorvalle van geweld teen buitelanders in Suid-Afrika.

“Die vergadering is belê om hulle te verseker dat die regering alle moontlike stappe doen om bestendigheid en kalmte in die land te verseker, asook om die stappe wat ons moet doen om soortgelyke voorvalle in die toekoms te voorkom, te bespreek,” het Pandor ná afloop van die vergadering gesê.

“Dit is belangrik dat daar ʼn platform en ʼn grondslag vir deurlopende samewerking tussen ons en die ambassades is, omdat hulle hul burgers wat in Suid-Afrika is die beste ken en ons kan help om na hulle uit te reik en brûe te bou.”

Geweld het Sondag weer in Johannesburg uitgebreek en die polisie het kerkgangers, mense wat inkopies doen en pendelaars gemaan om weg te bly van die MTN-taxistaanplek in die middestad ná die jongste reeks aanvalle.

Minstens een persoon is dood en talle ander is ná die voorval in hegtenis geneem, het die Gautengse polisie gesê.

Die aanvalle het ʼn diplomatieke relletjie veroorsaak. Verskeie Afrika-lande het reeds reiswaarskuwings uitgereik vir hul burgers wat in Suid-Afrika is, of hierheen op pad is. Sommige lande het selfs verder gegaan en Pretoria gevra vir duidelike maatreëls om buitelanders te beskerm. Daar was ook voorvalle waar Suid-Afrikaanse ondernemings in ander lande in wraakaanvalle geteiken is.

Pandor het gesê ten spyte van hul ongelukkigheid het die buitelandse gesante hulle tot ʼn gesonde verhouding met Suid-Afrika verbind.

Die plaaslike sakegemeenskap het intussen ook stem dik gemaak oor die aanvalle wat van Johannesburg na verskeie ander dele van Gauteng versprei het.

Die minister van polisie, Bheki Cele, het vandag met die uitvoerende hoofde van onder meer Multichoice, MTN, asook die Suid-Afrikaanse Kamer van Koophandel en Nywerheid (Sacci) vergader om die aanvalle te bespreek.

Mtho Xulu, president van Sacci, het gesê die organisasie gaan nou met die regering saam werk om die situasie dop te hou.

“Ons veroordeel die geweld en wil maan teen die aanvalle op sakeondernemings wat uiters kortsigtig is.”

MTN se groephoof, Rob Shuter, het gesê die selfoonnetwerk doen sake in 17 Afrika-lande en het meer as 200 miljoen kliënte. Weens die aanvalle moes vier winkels in Nigerië sowel as die hoofkantoor sedertdien hulle deure sluit.

Cele het gesê die polisie het ʼn aksieplan – wat hy nie wou bekend maak nie – en het die media gewaarsku om dit nie te laat lyk asof die Nigeriese president na Suid-Afrika reis omdat hier ʼn krisis is nie.

“Die Nigeriese president gaan oor ʼn paar weke op ʼn staatsbesoek in Suid-Afrika wees. Daardie besluit is al verlede jaar geneem en mense stuur nou die verkeerde boodskap uit. Hy was ieder geval op pad.”

Cele het gesê 639 mense is reeds in verband met die oproer in hegtenis geneem en dat dit nie gegrond is op mense se nasionaliteite nie, maar op beweerde onwettige optrede.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

24 Kommentare

jongste oudste gewildste
James

Die sogenaamde regering beteken niks nie
Die regering is die oorsaak dat SA sterf…

Johanna Botha

Vergader …spreek die probleem an !

Pieter

Hier is n kriesis mnr groot mond wat noem jy dit dit is die anc se probleem die land val uit mekaar en al wat die anc en sy president doen is praat

Tallies

Hierdie regering het ‘n perd opgesaal wat hulle nie kan ry nie. Hulle het nie die vermoe om dit te hanteer wat hulle begin het nie.

Thinus

639 wat gearresteer is en net weer vrygelaat gaan word, want saps is te lui om hulle werk te doen.