SAID hof toe oor Pauw se boek

Jacques Pauw, die skrywer van The President’s Keepers, by die bekendstelling van die boek in Pretoria (9 November 2017). Foto: ANA

Die Suid-Afrikaanse Inkomstediens (SAID) het ʼn aansoek teen Jacques Pauw, ʼn ondersoekende joernalis en outeur van The President’s Keepers, by die Wes-Kaapse hooggeregshof ingedien.

Die inkomstediens beskuldig Pauw daarvan dat hy die Wet op Belastingadministrasie oortree het deur belastingbetalers se vertroulike inligting bekend te maak.

Pauw het aan African News Agency gesê hy was verstom toe hy ʼn kennisgewing van die hofaansoek ontvang, maar dit voel asof dit ʼn erkenning is dat die onthullings in sy boek waar is. “Dit is nie ʼn aanval op die geloofwaardigheid van die boek nie, maar bevestiging van die geloofwaardigheid van die boek,” het hy gesê.

“Hulle wil bloot ʼn hofbevel hê dat ek die wet oortree het. Wat dan?”

Hy het gesê die saak sal vroeg in die nuwe jaar hanteer word aangesien sy prokureurs reeds met vakansie is. “Ek is nie bekommerd hieroor nie; ons sal dit teenstaan. Ek is seker daar is nog aan die kom.”

Pauw het gesê aanklagte is reeds by die Hatfield-polisiestasie aanhangig gemaak, wat hierdie hofaansoek “baie verrassend” maak.

ʼn Beëdigde verklaring van Tom Moyane, hoof van die SAID, haal ongeveer 15 bladsye van The President’s Keepers aan wat volgens die inkomstediens die wet oortree. Dit sluit onthullings in oor betalings wat aan president Jacob Zuma en Edward Zuma gemaak is. Dit behels ook Pauw se bewerings dat Mark Liffman, ʼn Kaapse bendelid, en ander glo honderde miljoene aan die SAID skuld.

Moyane het gesê die verklarende bevel wat aangevra word, is nodig weens die “belangrikheid en omvang van die oortreding”.

“Sulke verklarende bevele is noodsaaklik om vertroue aan die publiek te gee sodat hulle weet belastingbetalers se inligting kan nie sommer na willekeur deur derde partye bekendgemaak word wanneer hierdie derde partye geen gesag het om sulke inligting te besit of sonder gevolge te openbaar nie.”

Vroeër vandeesmaand is ʼn strafregtelike ondersoek teen Pauw in Durban begin. Kolonel Reuben Govender, wat na bewering ʼn reputasie het dat hy verdagtes intimideer, was die ondersoekbeampte in dié saak. Die saak is intussen by hom weggeneem en word nou deur die provinsiale hoofkantoor hanteer.

Pauw het gesê die prokureurs wat namens hom in Durban optree, doen dit op ʼn pro bono-basis en hy is oorweldig deur die “welwillendheid” van mense.

“Ek wil nie vir die volgende twee jaar van my lewe in regsgedinge gewikkel wees nie, maar as dit is wat hulle wil doen, sal ons baklei.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

25 Kommentare

jongste oudste gewildste
Eish

Op die keper beskou is die Pauw boek die enigste wyse waarop openbare belang gedien word synde die totaal korrupte staatdiens se volgehoue nalating om reg te laat geskied, die hele nes probeer wegsteek. Dit is n riem onder die hart dat soveel regsgeleerdes bereid is op pro bono op te tree vir die skrywer. Mag die vryheid van spraak, openbare belang en geregtigheid seëvier.

bgj van der westhuizen

wel die boek sit hulle in die oog wand as ek nie my belasting betaal nie is hulle gou op my net en hier is mense wat baie nie betaal nie en daar word niks gedeon om die te kry nie en nou kan die mense sien dat said nie hulle werk doen nie

Henk

In die Bybel staan geskryf dat dit wat in die donker is, in die lig sal kom……… En my eie afleiding is dat die wat in die donker is duidelik nie gaan hou van wat in die lig na vore gaan kom nie….. soos SAID, soos die Suptas, ens

Pieter van Niekerk

Die SAID gaan hulself in die voet skiet.

Hans

Wel daar het mens dit nou. vat jy die mense vas wat veronderstel is om n voorbeeld te wees kom jy in die moeilikheid. Ek wonder of SAID al gewonder en begin ondersoek instel hoe die inligting uitgekom het eerder as hul tyd en ons geld te mors om die boodskapper te wil skiet. Bewys vir my die teendeel dan praat ons…… in vandag se tyd en era wat ons is, is dit so maklik om inligting te bekom. Wonder maar net, is dit nie inligting in belang van die land nie????????? Name en shame is die game in vandag… Lees meer »