Sakeorganisasie waarsku teen Mededingingswetsontwerp

Piet le Roux, uitvoerende hoof van Sakeliga (14 Augustus 2018). Foto: Rozier van Tonder

Indien die Mededingingswysigingswetsontwerp 2018 goedgekeur word, sal die Suid-Afrikaanse ekonomie hom vir die volgende vlaag swart ekonomiese bemagtiging (SEB) moet voorberei.

Só sê die sake-organisasie Sakeliga (voorheen bekend as AfriSake) nadat hy die wetsontwerp bestudeer en kommentaar daarop by die parlementêre portefeuljekomitee vir ekonomiese ontwikkeling ingedien het.

“Die wetsontwerp gee veral kompetisiebeamptes die mag om SEB-kriteria in ag te neem wanneer hulle besluite neem. Dit sal beteken dat ’n kompetisiebeampte die mag sal hê om samesmeltings, verkrygings of prysgedrag te penaliseer, toe te laat of te verbied na gelang van die ras van maatskappyeienaars. Die wetsontwerp voeg wesenlik ’n raskomponent tot die definisie van mededingingswetgewing by,” het Piet le Roux, uitvoerende hoof van Sakeliga, gesê.

Le Roux meen Sakeliga se algehele besorgdheid is dat die wetsontwerp gesonde en algemene sakegedrag soos samesmeltings, prysbepaling en ander handeldryf aan verdere inmenging deur burokrate sal onderwerp.

“Hierdie inmenging sal tot verhoogde nakomingskoste lei, wat handel verder sal belemmer. Indien dit selfs moeiliker vir ondernemings gaan word om hul regsblootstelling aan ’n uitgebreide reeks vae en rasgeoriënteerde mededingingsoortredings weens die nuwe wetsontwerp te bepaal, sal dit die risikoprofiel van handel in Suid-Afrika verhoog. Die waarskynlike gevolg sal selfs minder beleggings én ’n verswakte ekonomie wees,” voeg Le Roux by.

In sy kommentaar aan die portefeuljekomitee hou Sakeliga vol dat die regering verskeie ander minder skadelike moontlikhede tot sy beskikking het vir die doeleindes van bemagtiging.

In sy voorlegging word daar ook beswaar gemaak teen die bekendstelling van nasionale sekuriteit as ’n ooglopende belang in samesmeltings met buitelandse ondernemings wat belange in Suid-Afrikaanse ondernemings wil bekom. “Artikel 18A van die wetsontwerp beoog die daarstelling van ’n presidensiële kommissie om toesig te hou oor samesmeltings in gevalle waar buitelandse ondernemings se belange in plaaslike bates geag word nasionale sekuriteitsimplikasies te hê.”

Le Roux voer verder aan nasionale sekuriteitsoorwegings word té wyd in die wetsontwerp gedefinieer en in werklikheid kan enige buitelandse onderneming wat met ’n Suid-Afrikaanse onderneming wil saamsmelt potensieel onder die bestek van hierdie oorwegings val.

“Dit sal net nóg ’n manier word waarop buitelandse ondernemings gedwing kan word om in te stem tot spesiale bemagtigingsooreenkomste, wat die moontlikheid van korrupsie aansienlik sal verhoog,” sê Le Roux.

Hy meen selfs ’n sogenaamde kliniese toepassing van mededingingsbeleid is deurspek met potensiële slaggate. “Die voorgestelde wet dra tot hierdie bestaande slaggate by deur burokrate se mag te verhoog om op ’n selektiewe wyse duur litigasie teen sekere ondernemings in te stel vir gerieflik gedefinieerde kommersiële misdade. Die wetsontwerp sal Suid-Afrika verder op die betreurenswaardige pad van regeringsinmenging lei. Dit belemmer en beswadder gesonde en algemene kommersiële handel, en sal sowel plaaslike as buitelandse beleggers afskrik,” sluit Le Roux af.

Sakeliga gaan op 28 Augustus 2018 om 9:50 ’n mondelinge voorlegging in die parlement oor die wetsontwerp voor die parlementêre portefeuljekomitee vir ekonomiese ontwikkeling doen.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

17 Kommentare

jongste oudste gewildste
Johan H.

En julle liberales dink dit sal ooiet end kry. Dieselfde met nie grond, as jy eers die duer oopmaak is daar net een pad. Selfde met hierdie invoer van Chinese. Oor 20 jaar sal SA onherkenbaar wees. Nie noodwendig mooie nie. Daar is geen persoon wat my verkeerd kan bewys nie.!!! Bbbeee is nie in LANDSBELANG nie!!

Snowball

Hulle kan netsowel apartheidswette teen wittes instel, want dit wat hulle met al hierdie voorskrifte ten doel het is niks anders as die bevoordeling van een ras, met die doel om ‘n ander te negeer nie.

Pietman

En tog is daar steeds groot mediagroepe wat oorsee en plaaslik verkondig dat diskriminasie teen die wit minderheid in Suid-Afrika bloot vêrregse samesweringstoeriëe is.

Hierdie artikel se inligting asook Sasol en soortgelyke stories moet die wêreld ingestuur word!

Johan

Ek is nou al só moeg vir die amptelike anti blanke beleidsrigtings van die regering, ek kan skree. Sal daar ooit n vry en regverdige bedeling in ons land kom waar alles op meriete en nie ras gehanteer word?

jakes

Ek is siek en sat vir BBBEE beleid wat veroorsaak dat blanke mense al hoe moeliker in die sakewereld gaan oorleef. Volgens my is dit niks anders as gewettigde diefstal. Geen wonder dat SA reeds oor die afgrond is tov ekonomiese beleid. Ek stem saam met Frikkie dat blankes moet net sake doen met blankes, dit gaan die enigste manier wees om te oorleef.