SAL lê dalk meer as 900 werkers af

Zuks Ramasia. Foto: SAL

Die Suid-Afrikaanse Lugdiens (SAL) het met ʼn herstruktureringsproses begin wat moontlik tot honderde werksverliese kan lei.

Zuks Ramasia, waarnemende uitvoerde hoof van die SAL, het gesê die lugredery se 5 146 werknemers is van die herstrukturering in kennis gestel en dat met ʼn konsultasieproses ingevolge artikel 189 van die Wet op Arbeidsverhoudinge begin is.

Die herstruktureringsproses kan tot afleggings lei, maar Ramasia het gesê sy is hoopvol dat die SAL die impak daarvan kan beperk en ondersteuning sal bied aan diegene wat wel geraak gaan word. Sy het gesê die SAL het oor die afgelope paar jaar verskeie uitdagings in die gesig gestaar wat tot die ernstige situasie gelei het.

Die uitdagings sluit in befondsing- en likiditeitsuitdagings; onvermoë om onbepaald te leen sonder om skuld terug te betaal; hoë rentekoste op lenings; die onbestendige en wisselvallige brandstofprys; wisselvalligheid in valuta; onvoldoende inkomste en kontantgenerering in verhouding tot bedryfskoste en ʼn verouderde vloot wat duur is om te onderhou en nie brandstofdoeltreffend is nie.

“Boonop is die SAL se balansstaat histories swak en bly dit so ondanks die onlangse aansienlike kapitaalinspuitings van die regering. Ons voortgesette verliese en afhanklikheid van regeringswaarborge om geld te leen, het die rentekoste verhoog wat die bedryfskoste van die onderneming beïnvloed.”

Volgens Ramasia moet die SAL dringend aandag gee aan sy finansiële posisie en dit is die rede vir die herstruktureringsproses wat sal poog om die doeltreffende implementering van sy omkeerstrategie te verseker te midde van die heersende operasionele uitdagings.

Al die SAL se afdelings en departement word deur die herstruktureringsproses geraak. Die lugredery se filiale, naamlik SAAT, Mango en Air Chefs, word nie geraak nie.

Ramasia het gesê dit is in die stadium moeilik om te skat hoeveel van sy werknemers deur die herstrukturering geraak sal word. “Geen finale besluit sal geneem word tot die konsultasieproses afgehandel is nie. Daar word egter geskat dat sowat 944 werknemers geraak kan word.”

Die konsultasieproses kan na verwagting tot 11 Januarie 2020 voortgaan.

“Hierdie moeilike besluite was nodig om die SAL op ’n meer volhoubare basis te plaas, terwyl ons verseker dat ons steeds die beste diens aan kliënte bied. Dit is baie jammer dat ons paaie met sommige getroue kollegas sʼn gaan skei. Ons doen alle moontlike stappe om te verseker dat hierdie veranderinge op ʼn sorgsame wyse bestuur word en dat almal waardig behandel word,” het Ramasia gesê.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

47 Kommentare

jongste oudste gewildste
Vier

Opgehou lees by “onvermoë om onbepaald te leen sonder om skuld terug te betaal..”

Marinda

Not surprised at all. What does surprise me is that it’s only about 900 people.

James

BEE besig om julle te byt? Telkom… poskantoor…. eskom…. transnet….

Jannie van Niekerk

Jaag net al die ANC kaders weg en los die gewone personeel. Daar sal miljarde rande aan salarisse gespaar word as daar GEEN ANC politikus in die SAL se diens is nie

Henry

Dit is presies die probleem in die hele land. Hordes word aangestel om een mens se werk te doen. Bloot omdat almal glo dit is regstellende aksie. Die staat het n grap geword. Ook te bang om mense te laat gaan asgv stemme.