SAL-raad kap terug ná bewerings oor ‘grys’ onderdele

(Argieffoto)

Die Suid-Afrikaanse Lugdiens (SAL) het Donderdag ten sterkste ontken dat sy tegniese afdeling (SAAT) nagemaakte onderdele gebruik wanneer vliegtuie van sy laekoste-redery Mango – of vliegtuie van enige ander redery wat hy bedien – versien word.

Die SAL se reaksie kom ná ʼn Sunday Times-berig oor ʼn ondersoek wat gedoen word nadat ʼn Boeing van Mango tydens ʼn vlug tussen Johannesburg en Kaapstad skielik begin duik het. Die Valke is ook besig om grootskaalse korrupsie en plundery by die SAL, aan wie Mango behoort, te ondersoek.

Luidens die berig is die skuld vir die voorval gepak op ʼn defektiewe onderdeel wat SAAT geïnstalleer het. “ʼn Voorlopige verslag deur die Burgerlugvaartowerheid (BLO) na verlede maand se Mango-voorval, plaas die kollig op ʼn defektiewe vervangingsmotor met ʼn versieningsrekord wat ‘nie met sekerheid nagespoor kon word nie’,” het Sunday Times berig.

Die koerant het berig niemand aan boord van die vlug is beseer nie en dit het veilig in Johannesburg geland.

Die SAL se raad het nou teruggekap en sê alle komponente en onderdele word van goedgekeurde verskaffers verkry en dat alle ondersteunende dokumente voldoen aan die BLO se vereistes.

“Die SAL wil bewerings in die media dat die redery erken het dat sogenaamde verdagte onderdele of komponente moontlik aan hom verskaf is, ten sterkste weerlê. Hoewel misdadige optrede nie uitgesluit kan word nie, is dit onwaar dat ʼn internasionale misdaadsindikaat die SAL of SAAT binnegedring het en dat [die sindikaat] verantwoordelik is vir tendermanipulasie en/of korrupsie daar nie.

“Daar is geen verband, direk of indirek, tussen die voorval wat tydens die Mango-vlug aangemeld is, en die kwessies wat tans by SAAT ondersoek word nie,” het die raad gesê.

Die SAL het gesê die onderdeel wat tydens die Mango-vlug probleme gegee het, is wettig verkry van die oorspronklike onderdelevervaardiger van Boeing 737-800-vliegtuie. SAAT het die onderdeel op 5 Augustus ontvang en dit is twee dae later geïnstalleer. Dit het na 96 vlugte en 125 vliegure die gees gegee.

“Ons wag vir terugvoer van die verskaffer, aan wie die onderdeel teruggestuur is sodat die oorsaak van die probleem vasgestel kan word. Mango en SAAT gee ook die nodige samewerking aan BLO in sy ondersoek.”

Die raad het gesê SAAT word deur die BLO geoudit, asook deur verskeie onafhanklike internasionale instellings.

“In my 20 jaar lange loopbaan by verskillende lugrederye, waaronder ses jaar in bestuur by Mango, het ek nog nooit gerugte gehoor of is ek bewus gemaak dat SAAT nagemaakte onderdele of onderdele wat nie nagespoor kan word nie, op Mango-vliegtuie gebruik nie,” het Juan Naude, Mango se vlugdirekteur, gesê.

Die raad het ook gesê om te verseker dat die SAL, SAAT en Mango aan alle bepalings voldoen, reik burgerlugvaartowerhede twee sertifikate vir elke vliegtuig in sy vloot uit. Die raad sê sy bedryfsertifikaat én lugwaardigheidsertifikaat is op datum.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

21 Kommentare

Dries ·

Hulle dink dit is n toyota quantum hulle gebruik tweede handse parte

Gert van Wierdapark ·

Ek soek ‘n waar borg dat die vliegtuig nie SAL val nie! He-he-he!

Rupert Ashford ·

Om ‘n bekende Suid-Afrikaner aan te haal: “He-he-he-he-he”. Sal nie verbaas wees as hierdie ouens ook ge-Gupta is nie.

Roger ·

Geen kans dat ek ooit binne een van SAL se vliegtuie sal wees nie. Dat een nog nie neergestort het nie is slegs genade

Jan ·

Indien SAA n geregistreerde herstelstasie onder die Amerikaanse FAA is behoort die insident aangemeld te word.
n Onderdeel wat selfs net verkeerd verpak is of verkeerd gestoor word of geval het kan “grys” onderdeel wees.
Kom ons hoop daar is professionele ingenieurs by die ondersoek betrokke.

Lood Kurkprop ·

Wanneer kwalifiseer n ingenieur as n “professioneel”…?

Ig ·

Lood, hy sit sy toebroodjies op die Engin Neer, dit is waneer hulle kwalifiseer

LK ·

Dries, dink ons nou presies dieselfde ding. O wee my wat is volgende???

Lood Kurkprop ·

Ek stel nie eers belang om met tweedehandse skoene iewers heen te loop nie….nevermind nog rondvlieg met tweedehandse “grys” engine parte in n vliegtuig.

Johan ·

Telkom, poskantoor, transnet, eskom, SAL, die weermag, polisiediens, munisipaliteite, watervoorsiening, plase, en so kan ek aanhou, als totniet. Dit hou net nie op nie. Aan die jonges wat hier lees- Dit was nie altyd so nie, dit is eintlik veronderstel om als reg te werk, en as julle wonder… Nee, dit werk nie nou reg nie.

Alet Klaassen ·

My seun twee maal probleme op hulle vlugte ervaar die afgelope twee maande en besluit dis heeltemal te riskant om van die ouens gebruik te maak.

jakes ·

Moenie SAL vieg nie, hulle is net so korrup soos alle ander staatsdepartemente. Hulle werkerskorps is 50% oorlaai. Voor 1994 was hulle een van die beste lugrederye ter wereld en was vliegtuie deur bevoegde en gekwalifiseerde tegniese mense versien. Natuurlik sou alles na 1994 verval omdat n korrupte en onbevoegde regering die land oorgeneem het.

Lukas ·

Lood weet jy wat is die opleiding en kwalifikasie standaarde om ‘n vliegtuig onderhoud ingeniuer (AME), veral vir seritifiseering te word?

Viss ·

Hoe erger hulle dit ontken kan jy maar aanvaar dat hulle skuldig is. Ry eerder met my kar waar ek wil wees. Die mense kan na niks kyk nie, alles word verwoes.

Dr Phil ·

Of soos daai ingelse digtertjie dit sou stel: “Methinks the lady protesteth too much…”

Jonathan ·

Wel, een SAL vliegtuig wat nooit sal val nie is die een wat jy sien op Maroela se hoofblad, waar mens klik om by hierdie blad uit te kom… ‘n SAL A380 nogal! Ons het nie sulkes nie!

Willem ·

Hoofblad foto wys ‘n A380 in SAL kleure… sou nogal mooi gewees het INDIEN ons sulkes besit het :-)

m ·

SAL genoeg bla-bla-bla, hou op bolliie praat en wys vir ons ‘n onbetwisbare versieningsrekord (nie ‘n vervalste een nie).!!

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.