Saloneienaar pak rower

Argieffoto ter illustrasie (Foto: Unsplash)

ʼn Vermeende rower het Dinsdagoggend sy moses lelik teëgekom toe hy en twee makkers op ʼn skoonheidsalon in Port Elizabeth toegeslaan het.

Kol. Priscilla Naidu, woordvoerder van die polisie, sê in ʼn verklaring drie onbekende mans het omstreeks 10:55 in ʼn skoonheidsalon in die middestad ingestap en ʼn vuurwapen op die eienaar van die salon en dié se assistent gerig. Die eienaar was in dié stadium besig om kontant te tel.

Die verdagtes het R5 000 gesteel en was net op pad uit met die geld toe die 38-jarige eienaar een van hulle plattrek. Sy twee makkers kon daarin slaag om met die geld te laat spaander terwyl die eienaar en die verdagte op die grond gestoei het.

Volgens Naidu het polisiebeamptes patrollie in die omgewing gery en ʼn kabaal buite die salon opgemerk. Die polisiebeamptes het ondersoek ingestel en die rower is in hegtenis geneem.

Die verdagte (20) sal binnekort in ʼn hof op aanklagte van sakeroof en die onwettige besit van ʼn vuurwapen en ammunisie verskyn.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

5 Kommentare

jongste oudste gewildste
Johanna Botha

Goedso !

Heksie

Ai, nou is die geld weg … maar wel gedaan vir die arrestasie van die skurk met die ongelisensieerde wapen en ammunisie!

Scalla

Knap gedaan, hoop sy ore is nou oop.

Hanlie

Goeie werk.