Geotech Aviation South Africa het bevestig dat ʼn ondersoek van stapel gestuur is na die helikopterongeluk, waartydens die Suid-Afrikaanse polisievlieënier Mike O’Donnell dood is.
Die helikopter het Donderdag oos van Mazabuka in Zambië neergestort.
Craig Siepman, uitvoerende hoof van Geotech SA, het bevestig die ses sitplek helikopter is heeltemal vernietig in die ongeluk. “Die helikopter, met registrasienommer ZS-HTS van Geotech Aviation, met een persoon aan boord, was van Zambië onderweg na Suid-Afrika toe dit op pad na Livingston neergestort het,” het Siepman gesê. “Die helikopter het op ʼn plaas neergestort en aan die brand geslaan.”
Die Zambiese departement van burgerlike lugvaart ondersoek die ongeluk saam met die Suid-Afrikaanse burgerlike lugvaartowerheid.
“Geotech Aviation betuig sy meegevoel en bid vir die slagoffer se familie en vriende,” het hy gesê.
Hy het nie uitgewei oor die oorsaak van die ongeluk nie en het gesê verdere besonderhede sal later bekend gemaak word.
Phindiwe Gwebu, woordvoerder van die burgerlike lugvaartowerheid, het gesê hul Zambiese eweknieë het beheer oor die ongelukstoneel, maar kan bystand versoek indien nodig.
O’Donnell se vriende en kollegas het Vrydag by die polisie se Air Wing-basis in Durban bymekaargekom om hulde te bring aan die gevalle vlieënier.
Bron: Jeff Wicks, News24
Wat maak ons polisie in Zambië?