SA’ners gaan verder les opsê by vulstasies

(Grafiek: pixabay)

Nog ʼn reusebrandstofverhoging tree Woensdag in werking.

Die styging word boonop vererger deur ʼn verhoging in die balansfondsheffing (“slate levy”) wat ook op 1 Desember in werking tree.

Die departement van minerale hulpbronne en energie het Maandag gesê die petrolprys sal Woensdag met 81c per liter styg, terwyl diesel tussen 72,5c per liter en 74,5c per liter duurder sal wees.

In Gauteng en ander provinsies in die binneland sal die prys van petrol nou vir die eerste keer die R20 per liter-kerf verbysteek. Die prys van petrol het reeds in November beduidend gestyg tot om en by R19,50 en die jongste verhoging kom kort voor die Desember-vakansie – slegte nuus vir Suid-Afrikaners wat die pad met vakansie wou vat.

Die prys van paraffien sal met 42,2c per liter styg, terwyl die kleinhandelsprys vir gas vanaf 1 Desember met R1,83 per kg verhoog word.

Gwede Mantashe, minister van minerale hulpbronne en energie, sê ʼn verhoging van 26,30c per liter (van die vorige 15,36c per liter tot 41,66c per liter) sal ook Woensdag in die prysstruktuur van petrol en diesel in werking gestel word.

Die gekombineerde balansfondsheffings van petrol en diesel het aan die einde van Oktober ʼn negatiewe balans van R4,6 miljard beloop. Dié heffing word gebruik om die bedryf vir onderverhalings te vergoed.

Daar is vandeesmaand ook ʼn aanpassing in die jaarlikse verhoging in die gereguleerde winsmarge vir raffinaderye en groothandelaars. Dit is met 17,84c per liter op petrol en 8,20c per liter op diesel sowel as paraffien verhoog.

Mantashe sê egter die jongste brandstofprysstyging word grootliks toegeskryf aan die skerp daling van die rand teenoor die dollar. Die rand het vroeër vandeesmaand op R14,72 teenoor die Amerikaanse geldeenheid verhandel, terwyl die wisselkoers nou op R15,85 teenoor die dollar staan.

Die gemiddelde prys van ruolie het ook van $82,50 per vat tot $83 gestyg.

“Die sleutelaandrywer van die hoër olieprys is die hoër wêreldwye vraag te midde van ʼn swakker aanbod van olieprodusente,” sê hy.

“Daar is ʼn groter vraag na olieprodukte as wat die mark kan voorsien.”

Die VSA en ander groot olieverbruikers werk saam om pryse in bedwang te hou deur olie uit hul strategiese voorraad vry te stel, hoewel olieproduserende lande weier om produksie in reaksie op die hoër aanvraag te verhoog.

Mantashe sê brandstofpryse skiet wêreldwyd die hoogte in.

“Verskeie lande het reeds rekordhoë brandstofpryse die afgelope tyd gesien.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

55 Kommentare

jongste oudste gewildste
Nettie

Dit is nou belaglik hoe die brandstof se pryse styg.

Alta Alleman

En ons moet dit gelate maar aanvaar :(

Papsak

Stop julle heffings op petrol en hou op ons petrol uit voer ander lande toe ons nie nodig on so duur te betaal nie en stop die staats amptenare sepetrol toelae kyk na die taxis hulle betaal geen belasting nie hoekom moet ons dan so duur betaal skrik wakker

Gerrie

Ons gaan tot n punt kom waar dit nie meer n grap is nie

Micheal

Iets wat vir my baie interessant is, is dat die Taxi bedryf glad nie staak oor enige van hierdie petrol verhogings nie! Dit is iets wat direk n invloed op die taxi bedryf behoort te he, Ek wonder maar net ????