SA’ners in Rio met messe beroof

Jacques Groenewald (links) en Anthonie Bougas (Foto verskaf)

Anthonie Bougas, kykNET-aanbieder en programvervaardiger, en sy vriend Jacques Groenewald is in Rio de Janeiro, Brasilië, met messe aangehou en van hul persoonlike besittings beroof.

Anthonie het Saterdag aan Maroela Media gesê die aanval het Dinsdagaand plaasgevind. Hy en Jacques is die week in Rio en sou ʼn musiekvideo verfilm het.

“Ons was by die Copacabana-hotel en het die aand omstreeks 22:00 gedink ons sal bietjie op die strand gaan stap. Die strande is gewoonlik baie veilig, want daar is baie ander mense en baie spreiligte wat die gebied verlig.”

Anthonie sê personeel by die hotel het hulle ook verseker dat dit veilig is om te gaan stap.

“Ons het op die strand geloop en ek het ʼn selfie geneem. Ek het die flitslig van die selfoonkamera gebruik en dit het vermoedelik verklap dat ons toeriste is. Die volgende oomblik het twee mans ons genader en sigarette gevra. Toe ons omdraai om te sê dat nie een van ons rook nie, het hulle messe naby hul lywe gehou.”

Anthonie verduidelik die mans het in Portugees gepraat en hulle kon nie die aanvallers verstaan nie. “Hulle het ons gedwing om op ons knieë te staan op die sand en groot messe, wat byna soos pangas lyk, op ons koppe gedruk. Hulle het in die vreemde taal bly skree en ons kon nie verstaan wat hulle wou hê nie. Ek het gedink hulle wou geld hê en ek het my bankkaarte uitgehaal, maar hulle wou nie dit hê nie. Hulle het uiteindelik ʼn rugsak met ons selfone en skootrekenaars gevat.”

Hy sê hoe minder hulle die aanvallers kon verstaan, en hoe meer hulle gevra het om in Engels te kommunikeer, hoe kwater het die aanvallers geword.

“Ons het later verstaan hulle wil hê ons moet na die see toe kyk – waarskynlik dat hulle kan weghardloop en ons nie kan sien in watter rigting hulle hardloop nie. Dis angswekkend om nie jou aanvaller te verstaan nie. Ek het nie geweet of hulle ons met die messe gaan doodsteek en of hulle ons gaan verdrink nie! Ek sal nooit vergeet hoe hulle in vreemde tale op ons geskree het nie.”

Niemand anders op die strand het die voorval sien gebeur nie. “Omtrent 10 meter verder het daar mense op die strand gedans en gesing en tog het niemand gesien wat met ons gebeur nie. Die aanvallers het dit baie goed beplan. Ons was op die verkeerde tyd op die verkeerde plek.”

Anthonie en Jacques is ná die aanval terug hotel toe, waar die personeel vir hulle gesê het rooftogte is algemeen, maar gebeur nie gereeld met toeriste nie.

Hulle wou aanvanklik nie die saak by die plaaslike polisie aanmeld nie, weens die kommunikasieprobleme en hulle was besorg dat hulle dalk self aangehou sou word. Anthonie het bevestig hulle sal die saak op die lughawe aanmeld wanneer hulle terugvlieg.

Anthonie het ʼn deel van sy musiekvideo reeds in New York, Thailand en Mauritius verfilm. “Ons het egter ná die traumatiese gebeurtenis nie enigiets in Rio verfilm nie.”

Anthonie het verlede jaar verloof geraak aan Launette van Niekerk toe hulle die verfilming in Thailand gedoen het.

Die twee mans vlieg Saterdagaand terug na Suid-Afrika. Hulle paspoorte was in hul hotelkamer.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

34 Kommentare

jongste oudste gewildste
sweis

Goed so,julle kom van SA dan gaan loop julle op die strand om 22H00 met skootrekenaars en waardevolle items nogal slim van julle tweetjies.

E.K. die eerste

Ek weet nie hoe die hotelpersoneel kon sê dis veilig nie. Hele paar jaar gelede al was dit op nuus of Carte Blanche of iets (kan nie meer onthou) waar mense JUIS op Copacabana strand in die helder daglig aangeval en selfs hul klere van hul lywe afgeruk is. ‘n Vriend wat by SAL gewerk het was eenkeer daar met ‘n groep reisagente en toe hulle die aand stap na ‘n nabygelee restaurant bestorm twee mans met messe hul en hy keer met sy hande om die meisies te beskerm en is sy hande oopgesny en moes hy steke kry.… Lees meer »

E.K. die eerste

Nog iets wat vreemd is: in paragraaf 4 het die hotelpersoneel gesê dis veilig en dan in paragraaf tien sê die personeel dis algemeen! Mens moet dus oppas in in Rio en ook nie sommer glo wat hotelpersoneel sê nie.

Shaun

Wie gaan stap met laptops op die strand in due aand?.. ….Klink baie verdag

Helena.

Dis jammer oor die voorval maar dis n les om te leer..jys nerêns veilig nie..dis hier in SA so erg, hulle skiet sommer. Dankie tog hulle lewe.