SA’ners leen meer om inkomste aan te vul

skuld-krediet-afbetaling-belasting-sakrekenaar-rekenaar-boekhou

(Foto: FirmBee/Pixabay.com)

Suid-Afrikaners se netto inkomste het sedert 2015 in reële terme aansienlik gedaal en verbruikers suiwer die tekort aan deur geld te leen.

Volgens die skuldberadingsfirma DebtBusters het gemiddelde skuldvlakke met 13% meer as die gemiddelde inkomstevlakke toegeneem.

Benay Sagar, bedryfshoof van DebtBusters, het gesê volgens hul jongste kwartaallikse skuldverslag het mense wat in 2019 by die maatskappy om skuldberading aansoek gedoen het, gemiddeld 15% minder reële netto inkomste gehad in vergelyking met diegene wat in 2015 aansoek gedoen het.

Die prentjie vir diegene met ʼn hoër inkomste – diegene wat meer as R20 000 per maand verdien – was nog slegter. Hierdie verbruikers bring in reële terme 20% minder huis toe as hul eweknieë in 2015.

“Die ander noemenswaardige bevinding is dat hierdie verbruikers hul lewenstyl finansier deur aansienlike onversekerde krediet uit te neem, dermate dat dit batefinansiering, soos huislenings en motorfinansiering, begin oorskry.

“Onversekerde skuldvlakke is oor die algemeen 40% hoër as wat ons vier jaar gelede gesien het. Vir diegene met ʼn hoër inkomste is dit 50% hoër.”

Die persentasie inkomste wat benodig word om skuld te betaal, is volgens Sagar ʼn duidelike bewys van die finansiële druk wat verbruikers ervaar. In die verslag is bevind dat DebtBusters se kliënte in die vierde kwartaal van 2019 sowat 64% van hul netto inkomste benodig het om hul skuld te betaal.

“Die gemiddelde kliënt se skuld-tot-inkomste-verhouding was 110%, maar vir diegene wat R20 000 of meer per maand verdien, was dit 134%.

“Dit is onvolhoubaar en het die afgelope vier jaar net erger geword,” het Sagar gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

8 Kommentare

jongste oudste gewildste
netekalleen

Het iemand al gehoor was spaar tot jy genoeg vir iets het ipv skuld maak???

isabelle

Om te kan spaar moet jy geld he om te spaar…

Asgat

Dit gebeur omdat ons nie verhogings in ons salarisse kry nie, want maatskappy sukkel met hul “cash flow”. Maar ons Huis huur, petrol, elektrisiteit, water en sanitasie, tax word alles opgesit wat dan beteken alles word duurder … ons moet meer en meer betaal sodat die minder bevooregte mense verniet alles kan kry…. Dit is hoekom n’ enkel ma wat werk al hoe meer skuld moet maak want daar is nie genoeg om die nodige kos, petrol, skoolgelde, skoolklere ens. te bekostig nie….

Vriendelike Frikkie

Ek weet nie hoeveel mense geld oorhou na al hul maandelikse verpligtinge nie, maar ek is nie een van hulle nie. Ek het reeds DSTV gestop, rook nie, drink nie, vakansies gestop, kleiner voertuig gekoop en nog steeds gaan dit broekskeur om gelyk te breek. Binnekort sal ek moet kyk na ‘n tweede inkomste soos motorwag, in my vrye tyd. Waar moet jy werk om genoeg te verdien om nog te spaar ook?

henndrik

Hierdie gaan nog baie erger raak in die nabye toekoms as gevolg van die regering se ekonomiese beleid, daar is nie spasie vir groei nie