SA’ners nie so siek van Omikron

(Argieffoto: Ronny Hartmann/AFP)

Hoewel die nuwe Omikron-variant tans ’n skerp oplewing in Suid-Afrika se koronavirusgevalle tot gevolg het, ervaar dié pasiënte slegs ligte simptome en word relatief min pasiënte in die hospitaal opgeneem.

In baie van die gevalle het die pasiënte slegs hoofpyn of ’n loperige neus gehad terwyl sommige nie eens enige simptome getoon het nie. Een ingeënte pasiënt vergelyk haar simptome met dié van ’n kopverkoue.

Mary Kawonga, voorsitter van die Gautengse Covid-19-bevelsraad, het Donderdag tydens ’n mediakonferensie gesê daar word ’n toename in Covid-19-opnames in die land opgemerk, “maar nie tot die punt wat ons tydens vorige uitbrekings beleef het nie.

“Hospitalisasie neem teen ’n baie laer koers as die gevalle toe, terwyl dit ook teen ’n baie laer koers as tydens die derde virusgolf toeneem,” het Kawonga gesê.

Tog is daar vroeë tekens dat die nuwe Omikron-variant ’n verhoogde risiko van herinfeksie inhou, sê wetenskaplikes verbonde aan die Universiteit Stellenbosch (US).

Dit is nou die eerste epidemiologiese bewys van die nuwe variant se vermoë om immuniteit wat deur infeksie bekom is, te ontduik.

’n Analise van roetine-waarnemingsdata van Suid-Afrika vanaf 4 Maart 2020 tot 27 November 2021 toon dat die herinfeksierisikoprofiel van Omikron aansienlik hoër is as dié wat tydens die tweede en derde golwe met die Beta‑ en Delta‑variante geassosieer is. Die waargenome aantal herinfeksies val reeds ver buite die voorspellingsintervalle.

Prof. Juliet Pulliam, direkteur van die Suid-Afrikaanse Sentrum vir Epidemiologiese Modellering en Analise (SACEMA) by die US, sê hy en ander wetenskaplikes wou vasstel of daar epidemiologiese bewyse is van ’n verhoogde risiko vir herinfeksie met die Omikron‑variant, in vergelyking met die Beta‑ en Delta‑variante.

Dit is volgens Pulliam ’n baie belangrike vraag, aangesien ’n toename in herinfeksies, eerder as nuwe infeksies, sal dien as ’n aanduiding dat die nuwe variant die vermoë ontwikkel het om infeksie-verworwe immuniteit te ontduik.

Dit is bevind dat die relatiewe risiko vir herinfeksie tydens die vorige twee golwe stabiel gebly het, maar dat hierdie risiko sedert die begin van Oktober en einde November vanjaar drievoudig toegeneem het.

“Met ander woorde, strydig met ons verwagtinge en ervaring met die vorige variante, ervaar ons nou ’n toename in die herinfeksierisiko,” verduidelik Pulliam.

Anne von Gottberg, ’n kenner by die Nasionale Instituut vir Oordraagbare Siektes (Nios), het Donderdag gesê dit word verwag dat die aantal gevalle in al nege provinsies eksponensieel sal toeneem.

Pulliam en sy medewetenskaplikes beaam dit.

“Indien die hoë aantal herinfeksies in Gauteng en nasionaal ’n aanduiding is dat Omikron infeksie-verworwe immuniteit kan ontduik, sal hierdie patroon teen middel-Desember in die ander provinsies ook ontwikkel.”

Pulliam en Von Gottberg sê egter albei dat die entstof waarskynlik steeds die beste beskerming teen ernstige siekte is.

‘Kopverkoue’

Jessica Willmore (38) vertel dat sy verlede Donderdag ’n seer keel en ’n hoes ontwikkel het.  Sy het die volgende dag ’n hoofpyn gehad, was moeg en het haar eetlus verloor. Sy het teen die einde van die naweek ’n loopneus en maagkrampe gehad. Haar eetlus was egter reeds terug.

Haar simptome het twee weke ná dié van haar negejarige dogter gevolg wat met ’n seer keel en loopneus van die skool af teruggekeer het. Die dogtertjie se simptome het egter oornag opgeklaar.

“Ons weet nie of dit Omicron is of nie,” sê Willmore.

’n 44-jarige advertensiepraktisyn en ma vertel dat sy onlangs positief getoets het vir Covid-19 nadat haar agtjarige dogter skielik ’n koors ontwikkel het en toe nog een van haar dogters.

Die ingeënte ma het self later ’n krapperige keel ontwikkel en was lighoofdig. Sy vergelyk egter haar simptome met dié van ’n kopverkoue.

Dit terwyl Donovan Rothner (42) geen simptome getoon het nie en nie eens geweet het dat hy Covid-19 opgedoen het nie. Hy vertel hy was asimptomaties totdat hy hom voor ’n operasie laat toets het en die toetsuitslag positief teruggekom het.

“As dit nie vir die prosedure was nie, sou ek nie eens geweet het dat ek die virus het nie, en dit sou baie mense in gevaar stel.”