Sannieshof-plaasaanvalle: Verdagtes ontsnap

Blackie van den Berg in die hospitaal ná die aanval. Foto: Verskaf

ʼn Grootskaalse soektog is deur verskeie rolspelers in Noordwes van stapel gestuur na drie verdagtes wat uit aanhouding ontsnap het nadat hulle onlangs in hegtenis geneem is in verband met twee gru-plaasaanvalle naby Sannieshof.

Marius Müller, nasionale veiligheidskoördineerder van AfriForum, het aan Maroela Media gesê die voorval het omstreeks 06:00 plaasgevind.

Twee van die drie ontsnaptes was glo in aanhouding in verband met die aanval en verkragting van Blackie van den Berg (61). Sy is op 2 Junie op ʼn plaas tussen Sannieshof en Ottosdal oorval, erg aangerand en verkrag. Twee verdagtes, onderskeidelik 21 en 24 jaar oud, is kort daarna in hegtenis geneem en was in aanhouding terwyl borgtogprosedures hangend was. Hul name mag nie genoem word nie, aangesien hul aanklag seksueel van aard is en hulle eers moet pleit.

Een van die ontsnaptes was glo betrokke by die moord en aanval op BC Greyling (59), sy vrou, Marlette (57), en BC se ma, Magdaleen Greyling (87). Die gesin het op 16 Mei omstreeks 19:30 die aand aan tafel gesit en aandete eet terwyl hulle nuus gekyk het.

Drie verdagtes het toegang tot die huis verkry deur een van die slaapkamers se groot vensters te breek. Drie het glo buite die huis gewaak. BC het gaan ondersoek instel en was skaars in die portaal toe ʼn verdagte hom trompop in die bors geskiet het sonder om ʼn woord te sê. Marlette is tydens die voorval in haar regterblad geskiet. Die koeël is links bó haar buik uit en het een van haar longe skrams gemis. Magdaleen het na die sitkamer gevlug en onder ʼn tafel weggekruip.

France Kubone (26), Tebogo Mogolotsane (28), Small Mokgele (29), Zacharia Nyalimathe (33), Musona Nyathi (35) en Joseph Zakenya (32) is op 18 Mei in Sannieshof en Ottosdal in hegtenis geneem ná ʼn uitgebreide ondersoek. Hulle staan tereg op aanklagte van moord, poging tot moord en huisbraak. Een van hulle is sedertdien op borgtog vrygelaat. Die ander was steeds in aanhouding. Dit is nie duidelike watter een van die vyf ontsnap het nie.

“Ons weet nog glad nie hoe hulle daarin kon slaag om te ontsnap nie. Alle veiligheidsstrukture is kort ná die ontsnapping in werking gestel. AfriForum-buurtwagte, Agri NW en TLU SA is by die grootskaalse soektog betrokke.”

Hy het gesê volgens die jongste inligting tot hul beskikking, is die drie te voet op grondpaaie tussen Sannieshof en Delareyville.

Volgens ʼn beskrywing van die voortvlugtendes se klere dra een ’n grys sweetpak, een het ’n rooi hemp en swart leerbaadjie aan en die derde verdagte dra ’n rooi baadjie.

Die polisie kon nie onmiddellik vir kommentaar bereik word nie.

BC en Marlette Greyling. Foto: Verskaf

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

55 Kommentare

jongste oudste gewildste
Penellope Jones

Daar is darem heelwat “ontsnappings” deesdae.
Wie is veronderstel om die mees bedag en op en wakker te wees, hulle of die polisie?

Eliza

Wat verwag jy van ‘n rommel-status land.

Sê maar net

Hoe pateties!!!! Name kan nie genoem word nie, liewe genade. Hulle het dade gepleeg, as hulle dan nog nie gepleit het nie, wie gee om. Ons soek die name sodat ons in ons pasoppens kan wees vir hierdie ‘mense’. As Polisie regtig vir hulle wil vang, dan moet hulle foto’s van hulle orals opsit sodat mense kan sien en kan rapporteer. Dit is so sieklik hoe name beskerm word van die skuldiges….en as jy nog nie skuldig is nie, as jy gevang word, dan het jy beslis ‘n deel daaraan.

Wit Willem

As ‘n polisie stasie geroof kan word, kan ek my maklik indink dat verdagtes kan ontsnap. Useless, man!

Rina

Hoe gebeur dit??? Misdadigers loop vry rond! Boere asb!!! Hou julle hande van hierdie mense af as julle hul teekom – bel eerder die Polisie! Verder hou ek liewers my opinie vir myself!