Sascoc: ‘Caster-uitspraak is massiewe keerpunt’

Caster Semenya. (Foto: Reg Caldecott / ANA)

Die Suid-Afrikaanse Sportkonfederasie en Olimpiese Komitee (Sascoc) het die uitspraak van die Internasionale Hof vir Sportarbitrasie (CAS) teen Caster Semenya veroordeel.

Dit kom nadat die CAS Woensdag teen die 28-jarige Semenya, ʼn Suid-Afrikaanse atleet, beslis het in ʼn regsgeding om die Internasionale Vereniging vir Atletiekfederasies (IAAF) se nuwe reëls oor testosteroonvlakke in die liggaam te betwis. Die CAS het albei versoeke vir arbitrasie in die verband van die hand gewys.

Semenya sal nou gedwing word om vir ses maande voordat sy deelneem medikasie te neem om haar testosteroonvlakke te verlaag.

Semenya wat jare gelede deur dieselfde omstredenheid gegaan het en toe haar saak gewen het, het ʼn span kenners gehad om die IAAF se beslissing teen te staan. Die internasionale atletiekliggaam probeer “hiperandrogene atlete” en persone met “verskille in seksuele ontwikkeling” dwing om behandeling te ontvang om hul testosteroonvlakke tot ʼn voorgeskrewe vlak te verlaag as hulle steeds as vroue wil deelneem.

Sascoc sê in ʼn verklaring die CAS het dus beslis die reëls vir atlete met verskille in seksuele ontwikkeling is diskriminerend, maar sulke diskriminering “is ʼn nodige, redelike en gepaste manier om die IAAF se doelwit om die integriteit van vroue-atlete in professionele sport te beskerm”.

“Ons stem hoegenaamd nie met die CAS saam nie. Dit is duidelik uit die uitspraak die toepassing van hierdie reëls is steeds ʼn bron van kommer, terwyl die atlete se vermoë om deurentyd aan die maksimum toegelate testosteroonvlakke te voldoen ook ʼn probleem kan wees. Ons hou vol hierdie reëls is swak deurdink en sal ʼn groot nadeel vir die geteikende vroue-atlete inhou,” het Natalie du Toit, voorsitter van Sascoc se Atletekommissie, gesê.

“Hierdie besluit is ʼn massiewe keerpunt aangesien daar nou herdefinieer word wat ʼn vroulike atleet is. Die vraag wat ons almal vra, is hoe gaan hierdie regulasies met gelykheid, onpartydigheid en regverdigheid in internasionale sport toegepas word. Ons glo hierdie besluit sal die talent van atlete hier in Suid-Afrika belemmer, en omdat ons vir Caster ken en weet watter harde werk sy in haar sport ingesit het, sal ons al haar strewes ondersteun en agter haar staan.”

Caster Semenya. Foto: AP Photo/Mark Schiefelbein

Gideon Sam, president van Sascoc, sê daar kan nie uit die oog verloor word dat die Verenigde Nasies die IAAF se regulasies as “onnodig, vernederend en skadelik” gekritiseer het nie.

“Daar is al lank op Caster se regte getrap en ons het gehoop hierdie saak sou die kwessie tot ʼn einde bring. Dit is betreurenswaardig dat sy en talle ander vroue wêreldwyd steeds onderwerp sal word aan sulke vooroordeel en oortredings en ontneem sal word van die geleentheid om te presteer en in die kollig van die sportwêreld te staan,” het Sam gesê.

Ook die ANC en die DA het hul skok en ontevredenheid oor die CAS se beslissing uitgespreek. Die ANC het in ʼn verklaring gesê die IAAF wat veronderstel is om waardes vir atlete te beskerm, het met vooroordeel opgetree op ʼn manier wat atlete skei eerder as verenig.

Die DA het ook die saak as “algeheel diskriminerend” teenoor vroue-atlete bestempel en ʼn beroep op Sascoc en die Suid-Afrikaanse regering gedoen om alle moontlike prosesse aan te wend om die besluit teen te staan en te baklei vir Semenya se reg om op internasionale vlak mee te ding.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

48 Kommentare

jongste oudste gewildste
Daan

Wel ek voel die da en anc sit die pot hele maal mis plaas bepaal hulle hulle by die politiek worry oor die land as wat hulle hulle neuse in die sport in druk

Caster

So nou weet Caster, en ANC hoe voel Steve. ..onmenslik wreed.

Andreas

Kom ek herhaal eerder die korrekte wyse van uitdrukking: Daar is lank genoeg op die regte van die ander deelnemers wat vroulik is vertrap, geregtigheid het nou geskied vir al daardie ander deelnemers en dit word nou reggestel deur Caster se testosteroonvlakke te reguleer.

Frik

Ander vroue kan nie meeding met iemand wie se testoroonvlakke gelyk is aan n man sin nie. Om dit toe te laat is onbillik teen ander vroue atlete. Luister net na stem.
Hierdie bepaling is n poging om die speelveld gelyk te probeer maak.

Wonder maar net

As SASCOC so sterk voel oor die benadeling van 1 vroue atleet, wonder ek wat is hulle siening van die kwotastelsel (transformasie) van die ander sportsoorte in SA.