Sassa-krisis: ‘Sassa lag vir die hof’

Hoofregter Mogoeng Mogoeng. Foto: Flickr/GovernmentZA

ʼn Volbank regters van die konstitusionele hof in Johannesburg het Dinsdag uitspraak voorbehou oor ʼn aansoek van die Suid-Afrikaanse agentskap vir maatskaplike sekerheid (Sassa) om hul omstrede kontrak met Cash Paymaster Services (CPS) met ses maande te verleng.

“As jy so vroeg as 8 Desember [2017] geweet het dat daar ʼn verlenging van die kontrak rondom die uitbetaling van maatskaplike toelae benodig word, hoekom wag tot Februarie om ʼn aansoek te bring,” het hoofregter Mogoeng Mogoeng gevra.

Sassa het aangevoer dat sowat 2,5 miljoen begunstigdes nie hul toelae sal ontvang as die kontrak met CPS nie verleng word nie. Die kontrak wat Sassa met CPS het verval op 31 Maart.

Volgens Mogoeng moes Sassa onmiddellik die hof genader het toe daar nog tyd was om ander opsies te oorweeg. Sassa kon nie daarin slaag om vir die hof te verduidelik hoekom die agentskap tot die laaste minuut gewag het voordat hulle die verlenging van die ongeldige CPS kontrak versoek het nie.

“Ons spreek ons frustrasie uit omdat daar onwettighede plaasvind terwyl ons toekyk. Dit is asof Sassa en CPS vir ons lag. Dit is net hartseer,” het Mogoeng gesê.

Mogoeng het Sassa daarvan beskuldig dat hulle die konstitusionele hof probeer afpers om die verlenging toe te staan.

Indien Sassa suksesvol sou wees, sal dié hul tweede verlenging van die kontrak met CPS wees ná verlede jaar se hofbevel waarin die hof gelas het dat Sassa ʼn verlenging van 12 maande van CPS se kontrak toegestaan word.

Sassa het in 2012 ʼn kontrak met CPS gesluit om maatskaplike toelaes te betaal, maar dié kontrak is later ongeldig verklaar.

Die konstitusionele hof het op 17 Maart 2017 beslis CPS se kontrak met Sassa moet met nog 12 maande verleng word om te voorkom dat die betaling van maatskaplike toelaes onderbreek word. Dít nadat die hof vroeër bevind het die kontrak was onwettig.

Die hof het sedertdien ʼn toesighoudende rol in die kwessie ingeneem en het Sassa opdrag gegee om kwartaallikse vorderingsverslae, wat aandui watter stappe hul gedoen het om te verseker die toelae word ná 31 Maart verder betaal, in te dien.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

20 Kommentare

jongste oudste gewildste
KP

Kla die onbevoegde Zuma lakei Dlamini aan vir minagting van die hof en laat sy ondersoek word vir korrupsie………. Daar gaan baie uitkom……. Dan is sy nog steeds n minister, moeilik om te verstaan…..

ontevrede leser

hr mogoeng, kyk rondom jou en jy sal sien daar is baie wat vir julle “lag”

zoom zoom

As die Hof nie eers kan optree teen sassa nie dan is dit regtig ‘n grap. As dot ‘n wit persoon was aanstuur van sassa wad daar al optogte nrande en die persoon sekerlik al gefire. En zuma en sy kaderes pluk die vrugte van die uitstel en uitstel so ook cps

hoe sê

Moenie worry nie in afrika is daar gelukkig altyd nog ‘n more en ‘n volgende maand en ‘n volgende jaar . Ploeter rustig voort

Nettie

Alles te danke aan Dlamini ………………Hoe sy nog n minister is, weet die duiwel alleen…………sy moes lankal gefire gewees het ………………..en sy het ook al die pad bank toe gelag ……………..
lekker “kick back” seker gekry ……..