SAUK skors werkers oor ‘sabotasie’ van Ramaphosa-toespraak

‘n Skermskoot uit die uitsending.

Die SAUK het drie permanente werkers en ʼn vryskutwerker geskors, ná bewyse aan die lig gekom het dat pres. Cyril Ramaphosa se onlangse toespraak “gesaboteer” is.

Die voorval het Donderdagaand plaasgevind toe die openbare uitsaaier die verkeerde weergawe van Ramaphosa se voorafopgeneemde toespraak op die program The Full View uitgesaai het.

Die SAUK se voorlopige ondersoek na die voorval het gewys dat beeldmateriaal vir die 18:00-uitsending van die president se toespraak betyds was om ʼn behoorlike uitsending te doen. Ten spyte hiervan is ongemagtigde veranderinge aangebring sonder dat daar met die nuuskantoor daaroor gepraat is.

Gevolglik het die program Ramaphosa se kleedrepetisie-toespraak aan die land gewys, pleks van die finale, korrekte weergawe, het Vuyo Mthembu, die SAUK se woordvoerder, gesê.

“Die SAUK gaan geen optrede of nalatigheid toelaat wat die openbare uitsaaier in oneer bring en sy pogings ondermyn om die sistemiese probleme met onwettige optrede en wanbestuur wat die instelling teister, uit die weg te ruim nie,” het Madoda Mxakwe, die SAUK se uitvoerende groephoof, gesê.

Phathiswa Magopeni, die SAUK se uitvoerende groephoof vir nuus en aktuele sake, het gesê daar gaan streng opgetree word teen enige werker wat betrokke is by aktiwiteite wat die SAUK se pogings om sy geloofwaardigheid te herstel, ondermyn.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

20 Kommentare

jongste oudste gewildste
Daan Erasmus

Hlaudi is weg. Die res is almal nog daar. Al die moeilikheid makers. Die wat aangestel is omdat hulle iemand se vriend is.

Karlahari

Dit laat my Ace….

Ilse

Hoe lyk dit, sal die saboteurs se name bekend gemaak word ?

Hennie

Kan iemand asb vir my sê of dit die SABC of SAUK is? Lyk my as dit slegte berriggewing is dan is dit SAUK, andersins is dit SABC..

jaco

SA raak nou nes Zimbabwe. Baie dieselfde goed het ook in kommunistiese lande gebeur. Amptenare wie se foute die onaantasbare amper volmaakte staatshoof in oneer gebring het, is summier afgedank en selfs doodgemaak. Wats volgende: eenpartystaat, vervolging van Christene?