‘SAUK moet blaam dra vir Suna se dood’

Suna Venter

Die VF Plus het Vrydag gesê Hlaudi Motsoeneng, die omstrede voormalige hoof van die SAUK, moet die blaam dra vir die dood van Suna Venter, die SAUK-joernalis wie se liggaam Donderdagoggend in haar woonstel aangetref is.

Adv. Anton Alberts, voorsitter van die VF Plus, het Venter in ʼn verklaring as ʼn dapper en onverskrokke joernalis en mens beskryf. “Ons veroordeel die gebeure verlede jaar by haar werkgewer en is van mening dat dit direk bygedra het tot haar stresverwante siekte en afsterwe. Sy het as deel van die SAUK 8 opgestaan teen redaksionele inmenging van die korporasie en is daaroor geskors,” het Alberts gesê.

Hy het gesê wat Venter moes deurmaak “om haar saak te stel” was skokkend en kom neer op teistering op die hoogste vlak. “Die oorsprong hiervan kan net voor die deur van Hlaudi Motsoeneng se SAUK gelê word,” hy gesê.

Alberts het gesê daar behoort ʼn behoorlike polisie-ondersoek plaas te vind om te bepaal wat die oorsprong van die dade teen haar was.

Maroela Media het vroeër berig Venter se familie glo traumatiese gebeure oor die afgelope jaar het tot haar dood bygedra of selfs haar dood veroorsaak. Venter se familie het Donderdag in ʼn verklaring gesê Venter het oor die afgelope paar jaar verskeie traumatiese gebeure deurgemaak en talle dreigende SMS-boodskappe ontvang.

“Daar is verskeie kere by haar woonstel ingebreek, die remkabels van haar motor is gesny en haar motor se bande is stukkend gesny. Daar is op haar geskiet en sy is ontvoer. Sy is aan ʼn boom by die Melville-koppies vasgebind terwyl die gras rondom haar aan die brand gesteek is. In ʼn aparte voorval vroeër vanjaar is sy in die gesig geskiet met ʼn onbekende wapen en moes sy ʼn operasie ondergaan om metaalkoeëls uit haar gesig te verwyder. In die afgelope jaar is sy in drie verskillende voorvalle aangerand,” lui die verklaring.

Intussen het die Suid-Afrikaanse redakteursforum (Sanef), die Suid-Afrikaanse burgerlike organisasie Sanco en die vakbond Solidariteit hul skok en hartseer oor Venter se dood uitgespreek.

Sanef het gesê Venter sal altyd onthou word as iemand wat nooit moed opgegee het nie, selfs al het dreigemente en intimidasie haar in die gesig gestaar. “Sy het geglo dat die openbare uitsaaier ʼn sentrale rol speel in die versterking van ons demokrasie,” het Sanef gesê.

Sanco het op sy beurt haar dood as ʼn “enorme verlies” beskryf. “Sy was ʼn dapper joernalis wat opgestaan het teen boelies,” het Jabu Mahlangu, woordvoerder van Sanco gesê. Mahlangu het sy teleurstelling met wetstoepassingsagentskappe uitgespreek omdat hulle nooit diegene wat hul skuldig gemaak het aan die misdrywe teen Venter in haar laaste maande kon vastrek nie.

“Hoe kan ons sê ons het persvryheid as dié wat die slegte deel van die samelewing moet blootlê in vrees moet lewe? ʼn Gepaste huldeblyk aan haar sou wees om die voorvalle wat sy aangemeld het te ondersoek,” het Mahlangu gesê.

Solidariteit het op sy beurt gesê Venter was ’n vegter en het geleef vir dit waarin sy glo. Dirk Hermann, bestuurshoof van Solidariteit, het gesê Solidariteit sal haar nalatenskap eer. “Ons dink veral aan haar familie in hierdie moeilike tyd. Ons hoop dat hulle troos en berusting sal vind in die feit dat sy uit die moed van haar oortuiging geleef. Daarvoor sal sy geëer word.”