SABC-gebou in Kaapstad Foto: Maroela Media
Die SAUK het Maandag gesê hy wag op die uitslag van ʼn ondersoek oor ʼn sekuriteitstender van R185 miljoen wat in die hof gedaag is deur iemand wat nie die tender gekry het nie, Mjayeli Security.
Die openbare uitsaaier het reageer op ʼn berig in The Star oor die tenderskandaal waarby die voormalige tussentydse raadsvoorsitter Khanyisile Kweyama en ander individue by die SAUK betrek word. Die persone word daarvan beskuldig dat hulle “op ʼn korrupte manier” verseker het dat die kontrak toegeken word aan Mafoko Security, in plaas van Mjayeli, alhoewel die eersgenoemde se tender R2 miljoen goedkoper was.
Die SAUK het gesê hy is verbind tot nakoming van die wette en regulasies en sal seker maak dat enige oortredings in die saak hanteer sal word. Ná ʼn e-pos van ʼn anonieme fluitjieblaser oor die beweerde korrupsie, het die huidige raadsvoorsitter, Bongumusa Makhathini, die hooggeregshof versoek om nie die saak aan te hoor totdat die ondersoek deur die spesiale ondersoekeenheid (SOE) afgehandel is nie.
“Die SAUK kan nie die uitslag van die SOE oordeel voor dit ontvang is nie, en glo dit is in belang van geregtigheid dat die verrigtinge opgeskort word totdat die ondersoek afgehandel is,” het die openbare uitsaaier in ʼn verklaring gesê.
