SEB: Hof verwerp Solidariteit se aansoek om appèl

Argieffoto (Foto: Unsplash)

Die konstitusionele hof het Vrydag Solidariteit se versoek om verlof tot appèl in sy saak teen die departement van toerisme van die hand gewys.

Solidariteit het hom tot die konstitusionele hof gewend nadat die hooggeregshof in Pretoria bevind het die departement mág ras as kriterium gebruik wanneer finansiële hulp aan kleinsakeondernemings toegeken word.

Die aansoek is op ʼn dringende basis gebring.

“Die konstitusionele hof het die aansoek oorweeg en besluit dat die aansoek van die hand gewys moet word, aangesien dit nie in belang van geregtigheid is dat die saak nou aangehoor word nie,” lui die uitspraak. Die rede wat die paneel regters hiervoor aanvoer is dat daar nie genoegsame redes aangevoer is waarom direk by die konstitusionele hof geappelleer is en waarom dit dringend is nie.

solidariteit-teen-discovery-veldtog-dirk-hermann

Dr. Dirk Hermann, bestuurshoof van Solidariteit.

“Dit is absoluut skokkend dat die konstitusionele hof nie op ʼn dringende basis die aansoek van Solidariteit oor die vergrype wil aanhoor nie,” se dr. Dirk Hermann, bestuurshoof van Solidariteit. “Dit gaan hier oor mense in uiterste nood as gevolg van ʼn krisis wat hulle op geen manier veroorsaak het nie. Nou moet hulle nog wag vir ʼn onsensitiewe hofproses.”

Hermann sê Solidariteit gaan nie die saak hier laat nie. “Die besluit om op grond van hoe mense lyk hulp te gee, is die laagtepunt van die regering se rasse-ideologie.”

Hy sê Solidariteit volg ʼn benadering in vier stappe in reaksie op die staat se rasse-ideologie. “Eerstens veg ons voluit in die hof, tweedens mobiliseer ons mense om nee te sê en nooit te aanvaar dat dit reg is nie. Derdens sê ons vir die gemeenskap om nooit afhanklik van die staat te wees nie en meer en meer dinge self te doen en mekaar te help. Gemeenskapkrag is ongelooflik sterk. Vierdens is ons regspan reeds besig om ʼn klag teen die Suid-Afrikaanse regering by die Verenigde Nasies oor sy rasse-ideologie in ʼn krisistyd te lê,” sê Hermann.

Die departement van toerisme het Vrydag se uitspraak verwelkom.

“Die uitspraak deur die Noord-Gautengse hooggeregshof het bevestig dat die speelveld tussen wit beheerde en swart beheerde maatskappye nie gelyk is nie, as gevolg van die land se historiese ongelykhede. Die uitspraak het ook bevestig dat raskriteria binne die wet val,” sê die departement in ʼn verklaring. “Die uitspraak van die konstitusionele hof strook met ons siening dat die saak geen wettige of morele gronde het nie.”

Die departement sê hy het reeds 13 000 aansoeke om finansiële hulp van sukkelende ondernemings ontvang. “Die departement is reeds in die proses om betalings aan begunstigdes te verwerk. Dit is belangrik om te noem dat dié begunstigdes swart én wit eienaars insluit.”

Hoewel die departement in die verklaring na Solidariteite én AfriForum se sake verwys het, het die hof Vrydag slegs uitspraak met betrekking tot Solidariteit se saak gelewer. AfriForum se aansoek tot appèl vorm nie deel van Solidariteit se aansoek nie.

Hermann sê indien die hof AfriForum se aansoek ook van hand sou wys, sal albei partye aansoek doen om by die hoogste hof van appèl in Bloemfontein te appelleer.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

65 Kommentare

jongste oudste gewildste
Oujongvrou

Ja Solidariteit en ek verstaan nie hoekom julle nie laaankal probeer veg het vir n onafhanklike plek vir ons minderheids groepe nie. Of hou julle ook maar van al die aandag wat julle kry met die geveg vir geregrigheid. Hierdie regering gaan ons al meer onderdruk tot ons almal opgekook is in daai pot kookwater.

Rodger17

Ek is glad nie verbaas nie.Die swart regering en regstelsel sal mos teen wittes uitspraak lewer,wat het solidariteit gedink

Pieter

Dit gaan orals in afrika so. Maar ons wit mense se belasting geld is goed genoeg. Gaan ons blankes ooit wakker skrik

Cleopatra69

Wit mense moet ophou bydra tot kos pakkies ens wat aan die regering oorhandig moet word

Cleopatra69

Elk maak eerder n bydra waar ek weet wit mense word gehelp. Ons het nerens meer n se nie, waag jy iets se is jy n rassis.