‘Selfie’ ná aanval maak opslae

Nathan Wood by die vermeende rower. Foto: Facebook

Nathan Wood by die vermeende rower. Foto: Facebook

Die foto van ʼn man van Kaapstad wat na bewering Saterdag ʼn vermeende rower bewusteloos geslaan het voordat hy saam met hom ʼn “selfie” geneem het, maak opslae op sosiale media.

Nathan Wood (27), ʼn leerlingrekenmeester van Kaapstad, het die foto Saterdag op Facebook gedeel nadat die rower sy moses teëgekom het nadat hy probeer het om Wood en sy vriend te beroof. Wood het die foto met die hutsmerke “#WrongPersonToRob” en “#Awkies” gedeel.

Terwyl sommige mense Wood geprys het vir sy dapperheid of die foto amusant gevind het, het ander Wood gekritiseer dat hy “eiegeregtig” en selfs rassisties is om ʼn foto saam met die bewustelose rower te neem.

Wood het aan Maroela Media vertel dat hy en ʼn vriend in die vroeë oggendure in Stellenbosch gestap het nadat hulle gekuier het en besef het dat twee vreemde mans hulle volg. “Ons het vinniger begin stap en probeer om hulle af te skud, maar hulle het op ons hakke gebly,” het hy gesê.

Hy sê in ʼn stil straatjie het die vermeende rowers op hulle afgestorm en geld van hom en sy vriend geëis. Volgens Wood het hulle geweier en dit is toe dat een van die rowers ʼn mes uitruk en dit teen sy bors druk. “Hy het met die hand wat die mes vasgehou het aan my sakke begin voel vir my beursie en dit is toe dat ek kans gekry het om hom een hou op sy kakebeen te gee. Hy was dadelik bewusteloos en sy makker, wat met my vriend besig was, het laat spaander,” het Wood gesê.

Volgens Wood het hy ʼn foto geneem voordat hy ʼn entjie in die straat afgestap het waar hy veiligheidswagte om hulp gevra het. Hulle is terug na die toneel waar die rower teen dié tyd besig was om wakker te word en het die polisie van een van die veiligheidswagte se selfoon gebel. “Ek het vinnig met die polisie gepraat en daarna die foon aan die veiligheidswag gegee om vir die polisie te verduidelik waar ons is. Dit was die tweede keer in my lewe in Stellenbosch, so ek was nie heeltemal seker hoe om aan die polisie te verduidelik waar ons is nie,” het hy gesê.

Wood sê hy was aanvanklik bekommerd dat hy dalk die rower ernstig beseer het, maar op die oog af het dit nie gelyk of hy eintlik seergekry het nie.

Hy het gesê nadat hulle ʼn ruk daar gewag het, het hy sy selfoonnommer aan een van die veiligheidswagte gegee en gesê die polisie kan hom bel in verband met die voorval. Hy en sy vriend is daarna weg en het die rower by die veiligheidswagte gelaat. “Ek het sedertdien nie weer iets van die veiligheidswagte of die polisie gehoor nie,” het hy gesê.

Lt.kol. Andre Traut, woordvoerder van die Wes-Kaapse polisie, het aan Maroela Media gesê sy kantoor het geen rekord van die voorval nie.

Op ʼn vraag oor die kritiek wat hy op sosiale media ontvang het, het Wood gesê hy steur hom nie veel aan die negatiewe kommentaar nie. “Hierdie was hoegenaamd nie ʼn rasse-voorval nie. Ek is ʼn mens en hy is mens en hy het my probeer beroof. So eenvoudig soos dit. Vir mense om dit nou in ʼn rasse-voorval te probeer omskep, is iets wat ek my net nie aan gaan steur nie,” het hy gesê.

“Dit is vir my baie interessant dat mense eerder kies om op die foto te fokus eerder as op die misdaad. Hierdie man het my aangeval met die bedoeling om my ernstig te beseer. Hy het immers ʼn mes teen my gedruk. Dit is asof mense gedesensitiseer geraak het teenoor misdaad, maar meer sensitief geraak het vir rasse-voorvalle. Indien hierdie rower nie my gekies het nie, maar eerder ʼn jong meisiestudent, kon die koerantopskrifte vandag baie erger gewees het.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

59 Kommentare

jongste oudste gewildste
Andrea

Wat n oulike idee! Dalk moedig dit mense aan om hulself teë te sit en te verdedig

Maria

Jy is ñ dapper jongman. Hierdie is ñ misdaad wat gepleeg is. Niks te doen met rassisme nie.

charles

Ek weet nou nie so mooi van die foto nie, maar ons het tog ‘n reg om ons self en ons goed te probeer beskerm waneer dit in gevaar is.

Jan

Well done boeta!

Van

mooi man!!!!!!!!!!!!!!