Selfs méér nou werkloos

Selfs meer mense was teen die einde van verlede jaar werkloos. (Argieffoto: Wikus de Wet/AFP)

Suid-Afrika se werkloosheidsyfer het tussen Oktober en Desember tot ʼn rekordvlak van 32,5% gestyg, het Statistieke Suid-Afrika (StatsSA) Dinsdag in sy kwartaallikse arbeidsmagopname aangekondig.

Die maande lange afsonderingstydperk wat weens die uitbreking van Covid-19 ingestel is, het die ekonomie ʼn gevoelige hou toegedien en tot duisende werksverliese gelei.

Die getal werklose mense het met 701 000 toegeneem, wat die totale getal werkloses op 7,2 miljoen in die vierde kwartaal van 2020 te staan bring. Dit het gelei tot ʼn beduidende styging van 1,7 persentasiepunte in die amptelike werkloosheidskoers.

Die getal mense wat in diens geneem is, het met 333 000 tot 15 miljoen tussen Oktober en Desember toegeneem. Die getal werklose mense het egter ook toegeneem – in hierdie geval met 701 000 tot 7,2 miljoen in vergelyking met die derde kwartaal.

Volgens StatsSA se opname het sowat 1 miljoen meer mense in hierdie tyd by die land se arbeidsmag aangesluit.

Al hoe meer mense het egter tou opgegooi met werksoekery. Die getal ontmoedigde werksoekers het tussen die derde en die vierde kwartaal met 8,7% toegeneem, ʼn styging van 235 000 mense.

Die getal mense wat nie ekonomies aktief is nie – vir redes anders as dat hulle ontmoedig is om werk te soek – is 1,1 miljoen minder, ʼn daling van 7,4%.

StatsSA sê die werkloosheidskoers ingevolge die uitgebreide definisie daarvan, het teen die einde van die jaar op 42,6% gestaan.

Nagenoeg 3,1 miljoen jong mense tussen 15 en 24 jaar oud het nie werk nie, en ontvang geen verdere opleiding of onderrig nie. StatsSA sê ook altesame 63,2% van jong mense tussen 15 en 24 jaar oud is nou werkloos en 41,2% van diegene tussen 25 en 34 jaar oud sit sonder werk.

StatsSA sê die werkloosheidskoers bly die hoogste onder swart Suid-Afrikaners en is hoër as die nasionale gemiddeld onder ander bevolkingsgroepe. Swart vroue is steeds die kwesbaarste en 38,5% van vroue in hierdie bevolkingsgroep het nie werk nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

15 Kommentare

jongste oudste gewildste
Liana

En dit gaan erger word met die huidige minimum loon verhoging wat absurd is

Persheks Adri

Hulle moet hulle president gaan bedank viva ANC! Daar gaan nóg meer sonder werk sit so hulle moet gaan bakhande staan by slim ANC

gehasie

Met die misbruik van C-19 deur allerhande belaglike maatreëls en BEE sal die situasie nie vinnig draai nie.

Grant

Te veel mense met ‘n aanhoudende bovolkings groei agv sassa en onbeheerde grense vol gate.

Blikkies

Ek kyk hierdie beraamde syfers maar met ‘n lang oog. Dit klink nie vir my reg nie. Daar is baie meer mense werkloos en dakloos as wat hulle beweer? Daar is beslis ander wat nie bygetel of beraam is nie. Praat nie eers van die onwettige immigrante nie en daar is klaar seker n paar miljoen? Raak net erger.